Ang Buaya Nga Dakog Tiyan
By Genamos_US of Washington DC, USA

Buaya gipangita sa Palawan
Perting taasa kitay kuyawan
Ngipon murag gabas likayan
Kon gutomon alibwag ang tanan

Gidungog nga daghan nang napaakan
Gumikan kay lumolupyo gikuntrahan
Karon kay ang buaya nadakpan naman
Nanghinaot nga adunay panag-ingnan

Kay dilikado kini kung yamayama-an
Kon maligo ta basin kita matripingan
Mga kabanay basin sila makuratan
Sa panghitabo nga dili kalikayan

Sagdi lang tong buaya sa karsada
Nagpuyo sa prosento nga dako-a
Kay permi man to kabusog nga buaya
Nga kusog manakop perting salbahisa

Busa likayi kanang buaya dakog tiyan
Kay magngisi permi kon kamo madakpan
Sigurado nga kamo makuwartahan
Kon dili ninyo siya mabantayan

 Kini akong asawa naggikan ni siya sa Southern Leyte, pero ang ilang pinulongan bol-anon, maingon na binisaya gihapon pero may kalahian gihapon sa mga uban termino, sama anang, "saging", ang prutas, ang tawag niya niini kay "hinog". Sa una abi nako gitawag lang niya kini kay tungod "yellow" ang kolor niini, pero dili diay, kay bisag green ang maong saging, sama anang mga saging na gikan sa davao, na gipanganlan sad usahay og "stampelco", hinog gihapon iya tawag niini, didto lang jud nako nasuta na saging jud diay, in general, ang iyang gipasabot sa "hinog". Usa pa, sa cebu, 'kan-on' ato tawag sa cooked rice, pero adtong misuroy ko sa parteng mindanao, labi na adtong mga bisaya-speaking na lugar, cagayan, butuan, etcetera, 'luto' man ila tawag sa kan-on. Siguro, i-consider sad nato ni diri sa atong dictionary, kini na mga pulong, "luto" og "hinog". 

Ang sakyanan SAFARI Alang SA PARI
By Genamos_US of Washington DC, USA

Giduaw nasad ang atong nagluyang nasod
Sa mga pagsulay ug hagit kita nasad napaud
Midako ug misulbong ang mga sugilanon
Nga sa dugay karon nangalisbo tukionon

Nakuykoyan ang mga buluwanong gasa
Nangayagyag og nahibos gipasa-pasa
Mga obisbo ug kaparian nga nangharana
Sa mga sakyanan nga 4x4 ang gitagana

Mga sakyanan nga adunay gamayng bugti
Ang pagsuporta sa simbahan ang isukli
Aron patabunan ang mga buhat nga hiwi
Ngadto kang Gloria ang goberno malahi

Ang nasud kuno walay igong kuwarta
Kay ang goberno kuno nag-agwanta
Kay bati ang kinatibuk-an nga ekonomiya
Ang tanan naapektuhan nga dili malingla

Mga milyones ang kantidad sa sakyanan
Giapod-apod gikan sa atong panudlanan
Mga kabus nga katawhan ang nag-antos

Pagahandumon Gihapon (aka Umbrella)
-eden mamac

Karaang payong nga atong gisaw-an
Hangtod karon akong mahinumduman
Daw mga batang gadula ilawom sa ulan
Katawa ug agik-ik ako pang madunggan 

Dako nakong pagtoo sa una
Ikaw kanako magpabiling higala
Pagbati mo wala panumbalinga
Gugmang gidalit nagpabuta-buta 

Hangtod nga wala na kaagwanta
Kasingkasing mo gikapoy ug naluya
Sa walay pagbuyag mipalayo ka sa akoa
Bugti sa kagawasan atong pag iya-iya 

Gibati ko ang kamingaw ug kahingawa
Nakaamgo nga dili mabuhi kung wala ka
Subo mang palandongon apan ulahi na
Ihunghong ko sa hangin, "ako pasayloa" 

Kanus-a Ikaw Akong Maako
By Genamos_US of Washington DC, USA

Mao kini ang gugma
Nga gitapigan ko sa una
Ang mga tuig nga milabay
Gibati ko kini sa kanunay

Unang tuig ko sa pagkat-on
Misamok sa akong kaugalingon
Mga luha nga akong giluom
Gumikan sa gugmang gilaum

Apan wala nimo panumbalinga
Kining dughan ko nga natingala
Ang pagbati mo usa lang ako kahigala
Natugkad ko ang gugma wala madala

Ikaw ang tanan kung gipangandoy
Matag adlaw gugma ko ang giasoy
Walay sipyat nga adlaw ikaw gipangita
Sa kasingkasing ko nga wala mahiluna

Gipadayag ko na kanimo ang karinyo
Aron makita mo nga ako nakagusto
Luhoi kining akong tinood nga pagbati
Bisag gamay aron imong akong masinati

Ilawom sa nagkaupos nga kagabhion
Ikaw ang unod sa akong hunahuna midayon

Midagayday Nga Mga Luha
By Genamos_US of Washingtong DC, USA

Usa ka gabii nga wala koy tulog
Sa mga panghitabo naghinuklog
Mga pulong unta akong tul-iron
Aron masabtan mo akong isugilon

Wala gayud nimo makita ang tinuod
Nga ang kasingkasing ko gipamatuod
Malisod sa akong dughan ang pagsabot
Kun man gani kasingkasing mo gisapot

Dili ba puwede kini nga atong estoryahon
Sama sa gibuhat nato kanunay sa kagahapon
Nahinumdom ka pa ba sa atong mga plano
Nga ang atong ugma napuno sa mga damgo

Gipangita ko ang mga tukma nga dalan
Aron ang gugma ta mabuhi imong laoman
Karon kay imo naman akong gitalikdan
Ang kasingkasing ko sama nga gilonupan

Pinalangga, kon imo man akong biyaan
Mag-unsa nalang ang akong kalibutan
Wala nga koy makitang kahayag sa ugma

 Sa karon, usa nako ka lumulopyo sa Bulacan, usa ka tagalog-manulti nga lugar, apan sa katinuod ako usa jud ka bisdak, gipanganak sa lapu-lapu. Sa kasingkasing nagpabilin gihapon ang akong pagkabisaya bisan pa kinse na ka tuig ako nahilayo sa lugar nga akong natawhan.  Sa barko ako nagtrabaho karon, daghan didto bisaya, maong mahinungdanon gihapon nga magpabilin ko nga bisaya. Ang akong anak, tres anyos ni siya, gipanganak diri sa bulacan, pero bisan pa naa mi diri, sa norte, tudloan ko pa gihapon siya og bisaya, kay para sa akoa kini na pinulungan, maingon ko nga "powerful",  in the sense na, ang mismong tingog sa pulong, sa mga termino, tugma ngadto sa iyang kahulugan.  Ang tumong, tuyo ug tinguha sa akong paghimo niining akong account kay aron maikabahin ko ang mga istorya na akong natigum sa partrabaho sa barko, sa pagpuyo ko sa dagat, tinuod man o dili, kini mga istorya lamang.

Gipahinungod kang Kurdapya

Malipayong Anibersaryo Sa Akong Ginikanan
By Genamos_US of Washington DC, USA

Ang Ginoo maoy nagpili kaninyong duha
Sa kinabuhi nga mag-uban bana ug asawa
Duha ka kasingkasing gibugkos sa langit
Kay sa gugma ug pagsalig kamo gisampit

Kasumaran karon sa inyong kaminyoon
Kasadya ug kadasig sa dughan saulogon
Mga unos sa kalisdanan kamo ra gihapon
Ang mag-uban sa kalipay ug kasakit isipon

Dili sayon ang mga dalan sa kinabuhi
Kun wala ang Diyos nga atong gipili
Siya ang tanan nga kadangpan daganan
Kay ang pangisip may igong utlanan

Malipayon kaming tanan nga nakaabot
Sa pagsaulog ning adlawa kami nahimoot
Dili matukib ang among tinood nga kalipay
Sa pagpasalamat nga modelo sa panimalay

Nanghinaot nga kamo padayon magsinabtanay
Sa matag adlaw kung duawon sa mga kalaay