Pagahandumon Gihapon (aka Umbrella)
-eden mamac

Karaang payong nga atong gisaw-an
Hangtod karon akong mahinumduman
Daw mga batang gadula ilawom sa ulan
Katawa ug agik-ik ako pang madunggan 

Dako nakong pagtoo sa una
Ikaw kanako magpabiling higala
Pagbati mo wala panumbalinga
Gugmang gidalit nagpabuta-buta 

Hangtod nga wala na kaagwanta
Kasingkasing mo gikapoy ug naluya
Sa walay pagbuyag mipalayo ka sa akoa
Bugti sa kagawasan atong pag iya-iya 

Gibati ko ang kamingaw ug kahingawa
Nakaamgo nga dili mabuhi kung wala ka
Subo mang palandongon apan ulahi na
Ihunghong ko sa hangin, "ako pasayloa" 

Ping-ot.

Bul-og ning mga luhang

midagayday sa subang uhaw

sa imong gugma ug kalooy.

Gi bangil ko ang bato sa kasilag

aron pagpugong sa pagkabanlas

ning pobreng payag sa akong dughan.

Nagtampisaw k'ing kasingkasing

sa maitom nga tubig sa akong kagu-ol.

Nag-inusa rang nagpaanod sa sulug

sa pinasagdang pagbati nga walay paglaom.

Apan unsay akong mahimo?

Kung dili suklian ug kalagot ang kabugnaw sa imong pagtagad.

Bukalon k'ing dugo, hubson k'ing luha sa mga mata.

Ihangad sa langit aron dili na mutulo pa.

Putlun ning pagtoo nga sa kanimo may mapa-abot pa.

Ginhawa.

-eden

Paborito nga Sud-an (aka Answer in Any Order)

-eden mamac

Dili ko ug talong nga gahi-on dili pud ko sa humokon

Dili ko sa gabing katol-katol unya dangog-dangog paakon

Samot nang dili ko sa okrang hait-hait, panit nga balhiboon

Akong gusto kanang U nga balanse perpekto ang kumbinasyon

Dili ko sa bu-ak nga kalabasang pula-pula dili pud ko ug lusparon

Dili ko ganahan muhigop sige sa sabaw sa batong nga langtohon

Dili gyud mutolo akong laway bisan pag pinikas nga subak apilon

Akong kinaham kanang UT nga sakto ug lamian, puno sa nutrisyon

Dili ko madani sa pagilok sa tutunlan sa gagmiting nga mga dahon

Mudigwa usab ako kung tibok-on sa paglunod ug dili hagpaton

Kinahanglan usab nga igo-igo ang kainiton usa nako ingkiton

Katawhan sa Kuku sa Kangitngit
(-eden mamac)
 
kagilkil sa mga kabhang daw sinselyong giuntog sa semento,
wala ako nakapamilok sa pagsud-ong sa natagak nga mga basiyo,
makabungog nga hadyung human sa sunod-sunod nga mga buto,
gibawsan ug lagapak sa nahagsang ulong may lungag sa sentido.
 
 sa nasaksihan ako mikaging ug wala makalihok,
daw ang orasan mitiurok, mihunong sa pagtuyok,
lawas gihabulan sa grabeng kalisang ug kahadlok,
daw kandelang gilamoy sa kangitngit nag-inusarang gibagdok. 
 

Dugkal sa Akong Amiga
-eden mamac
(Usa lamang ang akong gihangyo sa dili pa mo mopadayon.
Hinaot hangtod sa katapusan dili kamo moundang, ug inyong basahon.
Ablihi ang mga huna-huna ug kamatuoran hinaot atong pasudlon....)
 
Kumusta, akong amiga
sa taas nga panahon wala na kita magkita
lab-as pa kaayo sa akong huna-huna
katapusang higayon sa paghikap ko sa imoha
 
maayo pa kaayo atong sabot sa atong panagbulag
nga sa sunod wala na, dili na kita mag-usab
wala ka mosonar, wala man gani motubag
pagtuo ko akong kalinaw imo na nga gihatag