Dugkal sa Akong Amiga
-eden mamac
(Usa lamang ang akong gihangyo sa dili pa mo mopadayon.
Hinaot hangtod sa katapusan dili kamo moundang, ug inyong basahon.
Ablihi ang mga huna-huna ug kamatuoran hinaot atong pasudlon....)
 
Kumusta, akong amiga
sa taas nga panahon wala na kita magkita
lab-as pa kaayo sa akong huna-huna
katapusang higayon sa paghikap ko sa imoha
 
maayo pa kaayo atong sabot sa atong panagbulag
nga sa sunod wala na, dili na kita mag-usab
wala ka mosonar, wala man gani motubag
pagtuo ko akong kalinaw imo na nga gihatag
 
gidawat ko sa tumang katin-awan
gihinam nga kagawasan akong natagamtaman
sa nilabayng mga adlaw ug mga bulan
gisubay ko ang matul-id nga dalan- gawas sa kasal-anan.
 
apan daw susama sa drama ug telenobela
ania kita karon atubangan sa usag-usa
paspas nga pitik sa dughan ko pamati-a
huna-huna nagdumili, kasing-kasing nagduha-duha
 
kalit mi salida pagbalik
ang binuhatan ta inig abot sa kangitngit
mga hagawhaw ko ug pagping-it
gisuklian mo ug dugo ug mga hilom nga syagit
 
sa kada bira nako ug kuhit,
dag-on ako sa kakatol sa pag puok sa pagdul-it
bisan pa nga masamdan ang panit sa kilid
gilawm pa ug ligwat aron kinaugatan akong malugit
 
usahay akong hinayhinayon usahay kaliton
ikaw usab pa dili-dili apan madala ra gihapon
mitubod ang singot, mitulo ang sip-on
gipiyong ang mga mata, gipaak ang ngabil sa ngipon
 
haaay, kadali ba sa tuyuk sa kalibutan
balik na usab kita sa atong nasugdan
ikaw nga mi-usbong bunga sa kinaiyahan
bisan unsaon ug limod dili gayud nako kabalibaran
 
gusto na baya gyud unta ko nga atong undangon
ang atong mga binuhatan nga gitago ta sa hilom
apan sa kalit nga pagbutho mo karon
gipangita ko na usab ang katagbawang lawasnon
 
wala akoy mahimo kung ikaw balewala-on
kumagko sa tiil magkurug kung dili ka kulitogon
maong nipper, pusher ug tincture ako nalang andamon
sugdan ko na usab ang pagdugkal kanimo- amiga ko nga ing-gron
 
-eden mamac