Pagahandumon Gihapon (aka Umbrella)
-eden mamac

Karaang payong nga atong gisaw-an
Hangtod karon akong mahinumduman
Daw mga batang gadula ilawom sa ulan
Katawa ug agik-ik ako pang madunggan 

Dako nakong pagtoo sa una
Ikaw kanako magpabiling higala
Pagbati mo wala panumbalinga
Gugmang gidalit nagpabuta-buta 

Hangtod nga wala na kaagwanta
Kasingkasing mo gikapoy ug naluya
Sa walay pagbuyag mipalayo ka sa akoa
Bugti sa kagawasan atong pag iya-iya 

Gibati ko ang kamingaw ug kahingawa
Nakaamgo nga dili mabuhi kung wala ka
Subo mang palandongon apan ulahi na
Ihunghong ko sa hangin, "ako pasayloa" 

Pastilan nganong akong napasagdan
Kinahanglan ba masakitan una masabtan?
Abi ko ug mga katawa walay nay utlanan
Karon nangandoy nga mabalik ko ang tanan 

Apan bisan pa tingali ug ako matagaan
Usa pa ka kahigayonan imong tugutan
Siguro dili lang gihapon nako matambalan
Ang grabeng kasakit nga imong nahiaguman 

Maong pagahandumon ko lang gihapon
Mga nangagi ta ug mga kagahapon
Ikaw ang bitoong dili ko na gayud maangkon
Ang kahayag sa mga gabii kong madag-umon 

Ug sa dihang mibunok pagbalik ang ulan
Imong katawa akong nadunggan sa unahan
Apan uban sa paghilak sa langit ako nasakitan
Kay lahi na ang payong nga imong gipasilongan 

-eden