Pakigol Nga Kagool

-eden mamac

iloom ko nalang ning tanan kong gibati

ihangad sa langit pugngan ang luha sa pagdahili

mga damgo ko pait nga kapalaran ang nagdumili

sa mamingaw nga payag mag-inusara ako nga mopauli

lantawon ko sa unahan ang paglubog sa adlaw sa kasadpan

pangitaon ang kanindot sa pagpuli sa mabugnaw nga bulan

kangiob ug kangitngit sa dalan nga ako karong gilakwan

katahap ug pagduda sa kahayag sa iyang gingharian

misidlak ang mga luhang sa mga matang pinugngan

galisod sa pagginhawa ang gahoot ko nga dughan

gapaabot nga mabuhian, kalinaw ako mapahamtangan

apan lisod na pagbalik, taas na ang akong naagi-an

hamis ug timgas ang paa sa dalaga nga akong naibgan

nahatintal ako sa kalami sa bunga bisan pa ug gidid-an

bus-ok ug puno sa duga ang pinahinog sa punuan

sala ba ang mutubag sa yutan-ong katagbawan?

karon ulahi na ang tanan desisyon ako nang nabuhian

ako nang gisuklian ang bayad sa akong kasaypanan

sa payag naghinamhinam ang nagpakigol nga kagol-anan

dimdimon ko na usab ang katam-is sa akong kapakyasan.

-eden mamac