Paborito nga Sud-an (aka Answer in Any Order)

-eden mamac

Dili ko ug talong nga gahi-on dili pud ko sa humokon

Dili ko sa gabing katol-katol unya dangog-dangog paakon

Samot nang dili ko sa okrang hait-hait, panit nga balhiboon

Akong gusto kanang U nga balanse perpekto ang kumbinasyon

Dili ko sa bu-ak nga kalabasang pula-pula dili pud ko ug lusparon

Dili ko ganahan muhigop sige sa sabaw sa batong nga langtohon

Dili gyud mutolo akong laway bisan pag pinikas nga subak apilon

Akong kinaham kanang UT nga sakto ug lamian, puno sa nutrisyon

Dili ko madani sa pagilok sa tutunlan sa gagmiting nga mga dahon

Mudigwa usab ako kung tibok-on sa paglunod ug dili hagpaton

Kinahanglan usab nga igo-igo ang kainiton usa nako ingkiton

Kay kung imong pasubrahan malata ang imong UTN, pait nga kondisyon

Basta kay dili ko sa manok, dili pud ko sa baboy nga mantikaon

Hard bowil nga itlog ug sinugbang hotdog bisag duol dili na nako lingion

Sipuds sama sa ginamos, amahong, buwad, ug sinilian nga hipon?

Dili makalupig sa akong paborito nga UTN bisan pa ug ang tanan sagolon

Sori na wrong espeling mga igsoon

Sabta nalang kining inyong ubos nga ulipon

Paborito kong sud-an, kung espeling inyong usbon

Taronga paghan-ay aron sa simbahan dili kita buyagon