Katawhan sa Kuku sa Kangitngit
(-eden mamac)
 
kagilkil sa mga kabhang daw sinselyong giuntog sa semento,
wala ako nakapamilok sa pagsud-ong sa natagak nga mga basiyo,
makabungog nga hadyung human sa sunod-sunod nga mga buto,
gibawsan ug lagapak sa nahagsang ulong may lungag sa sentido.
 
 sa nasaksihan ako mikaging ug wala makalihok,
daw ang orasan mitiurok, mihunong sa pagtuyok,
lawas gihabulan sa grabeng kalisang ug kahadlok,
daw kandelang gilamoy sa kangitngit nag-inusarang gibagdok. 
 
paminsar sa kalit mi andar pagbalik,
daling mihapa nawng sa sawog gipapilit,
grabeng kakulba kasingkasing paspas ang pagpitik,
nanghinaot nga sa akoa bala dili unta muhapit.
 
niadtong mga taknaa walay laing misulod sa huna-huna,
nakapanghupaw ako ug sa kaugalingon nakapangutana,
ngano ug naunsa naman kining kalibutana?
pagkutlo ug kinabuhi pwerte nalang gyud bang sayuna?
 
ug human mihupa ang kagubot,
kasaba gihulipan ug kamingaw sa palibot,
nakita ko ang birador nga sa motor misakay ug nipabulhot,
nakiglumba sa mga irong walay pu-as ang pagpaghot. 
 
kinsa ang maka-ako sa pagpugong ug pagsumpo kaniya?
kinsang mga kamot ang boluntaryo ug ganahan nga mo-isa?
kinsa ang motestigo ug ang maisugon nga mukanta?
kinsa ang mugiya sa babayeng gadala ug timbangan nga may taptap ang mga mata?
 
kalouy ug kapungot ang gibate sa akong naaninaw,
sa unahan, asawang gasapnay sa lawas sa banang mipanaw,
mga luhang miagas ug hilak sa mga batang nangapagaw,
mga kalipay, mga damgo ug mga paglaom nga sa kalit gihikaw ug nahanaw.
 
...kagilkil sa mga sinselyong gipang-itsa sa semento...
...mga tawong namunit sa limos samtang gasunod sa karo...
...duha ang gilubong karon, duha ang gisulod sa nitso...
...ang patay ug ang hustisya-- nangluum sa minteryo...