sa humay pwerti ka kalas
kun mokaon grabe ka paspas
paglung-ag og daghang bugas
kun dunay buwad nga pinikas
 
parat parat kung imo nga tilawan
kung may suka samot kang ganahan
kinaham sa pungko pungko
bahalag mosakit ang tangkogo
 
si inday dili sad magpaalkansi
kang dodong kusog moabi abi
ayaw og kumpyansa sa lalaking hilas
kay ilang tuyo imo rang pinikas
 
kung sa taboan daghang buwad
sa junquera naa say gilad lad
gibaligya ang ilang pinikas
kay sa  kinabuhi gidimalas
 
morag pati nga mogbo og lupad
sa syudad sa sugbo naning palad
gihimong puhonan ilang kalag
giusikan ang ilang ka hubag
 
gitapok-an sa mga lalaking higal
mas nindot kuno kung medyo mahal
mga bugaw hawod sa ka abtik
sa kustomer kusog mangatik
 
sagol sagol naay istudyante
san carlos,UC og san jose
midterm kuno pang tuition
I.D. nila maoy solusyon
 
duna say mga baratohon
kuyaw lang ka nga kirkiron
mosogot bisag bayran og kapi
kay buntag na wala pay agi
 
ang Diyos raba ang ilang pasanginlan
ngano kuno nga sila gipasagdan
ngano nga ang uban adunahan
sila buwad ray gisud-an
 
hinaot nga inyong masabtan
nga ang Diyos andam motabang
lihok tawo kay tabangan ko ikaw
bisag mapandol padayon paglakaw
 
ayaw ninyo basola ang Ginoo
kay duna siyay dakong plano
bisag unsa kabug-at sa pagsuway
pag ampo aron ka molahotay