Binuang uyamot ang konsepto sa creatio ex nihilo
dili mahimo kun imposible ang creatio ex nihilo nga buot ipasabot "pagmugna gikan sa wala"
1. pinasunod sa gumaranong panabot, "walay wala nga anaa kun ang wala gani dili gayod mahimong anaa"
2. pinasikad sa pisika, misupak kini sa unang balaod sa termodinamika
sumala pa sa usa ka ang teyista nga nagsunod sa klasikang o kukaraang griyegohanong pagsabot sa diyos, mahimo kuno sa diyos ang tanan apan matod usab kanila dili usab makabuhat ang diyos og mga kasukwahian sa lohika/pangatarongan
pananglit, ang 2+2 dili gayod mahimong motumbas sa 5, dili mahimong wad-on sa diyos ang iyang pagkadiyos ingon man nga dili siya makabuhat og bug-at uyamot nga bato nga dili nila mahimong aswaton.
nan tataw gayod nga may kinutoban ang diyos sulod sa lohika. wala gayoy kawalaan sa kahulogan niana daan busa dili gayod kana mahimong usa ka butang nga anaa sanglit sukwahi kana sa lohika.
ug tungod giisip sa teyista nga axiom (kun usa ka masukaranong katinuoran) ang diyos, nga usa ka dumalayong pagkaanaa, nagkahulogan gayod nga gimugna sa diyos ang lukopngatanan gikan sa iya mismong kaugalingon. Mihaom kini sa emanasyonismo (ang pagtuo nga ang lukopngatanan nagatubod mismo gikan sa diyos) ug panteyismo (ang pagtuo nga ang diyos mao ang mismong lukopngatanan) busa atong mapangataposan nga ang lukopngatanan gama mismo sa diwa, uyok kun pagkamao sa diyos.
Malimbongon gayod ang kadaghanan sa mga apolohistang teyista, ipasumangil nila ang lohika aron makalusot sa suliran nga dili mabuhat sa diyos ang tanan samtang moingon dayon sila usab nga ang diyos labaw ug saylo pa sa lohika. Giilin-ilinan ra nila ang lohika kon kanus-a mouyon kun mopabor kanila.
- Arjuna Dalakilat's blog
- Login or register to post comments
Comments
Pagpanghimakak sa pagbatok ni JCH sa unang pangatarongan
Nah, mao ka karon napamatuod lamang nimo nga wala diay gayod nimo matuhog ang uyok sa akong pangatarongan. Nan karon ibutyag ko na ang tutulo ka bitik diin ikaw masango ug wala gayoy dag-anan gikan niini.
I. Unang Bitik
Gimugna sa Diyos ang tibuok lukopngatanan gamit ang bug-os nga kawalaan isip ang materyales kun sukaranan diin kini giingong kapanguhaan.
P1 Kinahanglan itugot sa Ø sa labing diyutay nga kasarang aron nga mapakaanaa ang pagkawala.
P2. Tigpahinungdanong katakos ang mismong pagtugot sanglit magkinahanglan man og gahom ang Ø aron kini makapatugot og bisan unsa mang kahimtang.
P3: Apan "WALA GAYOY GAHOM" mao ang pagkahulogan sa Ø busa wala kini pagbulut-an nga mohatag, motugot kun maghinungdan man og bisan unsa mang butanga lakip na ang kaugalingon niya isip panguna ug masukaranong kahimtang.
K: Nan, binuang ug walay klaro ang unang bitik pinasunod sa kahulogan sa Ø, wala pa gani mahisgoti ang alamiya (pisika) ning panaglantugi.
II. Ikaduhang Bitik
Gimugna sa Diyos ang lukopngatanan gikan sa butang nga may makinaugalingong pag-anaa nga dili mao sa Diyos.
P1: Nagkinahanglan kini og butang nga may dumalayong pag-anaa NUNOT sa Diyos
P2: Milapas ug misupak kini sa makinaugalingong pag-anaa lamang (aseity) nga buot ipasabot ang pamarog sa Diyos isip ang bugtong tagmao nga dili maagaron wala magsukad sa bisan unsa mang butang kun kahimtang, ang pagkamao nga gikinahanglan gayod uyamot nga walay kapagkamaohanong katigi.
P3: Dayag uyamot ang pagsalikway sa kakaraanong teyismo (classical theism) niining maong baroganan. Ug sukad masukad wala gayod kini giilang kapilian sulod nianang batasana.
K: Dili mahimong angkonon sa mga misunod ug mibatasan sa pagka-kakaraanong teyista ang ikaduhang bitik kay tungod matalikdan usab kanila ang makinaugalingong pag-anaa lamang sa Diyos nga maoy sukaranang pagtuo niini mismo nga baroganan
III. Ikatulong Bitik
Nagmugna ang Diyos isip ang bugtong tigpahinungdan nga dili gikan sa butang gawas sa iyang paggahom (external material), dili gikan sa iyang kaugalingong pagkadiyos hinunoa lunlon lamang nga gipakaanaa pinaagi sa pagbuot ug gahom nga nagpatuman taliwala sa bug-os nga kawalaan.
P1. Ang tinago nga suliran sa Ø. Kon ang Diyos tanan ang mitampo sa pagbuhat (katuyoan, pagbuot, gahom ubp.) ug ang "wala" wala gayoy ikatampo pinasunod sa kahulogan niana, gipahulagway lamang niana nga naggikan sa Diyos ang tibuok pagkamao sa lukopngatanan. Dili na kana ex-nihilo kondili ex-deo (gikan sa pagkadiyos) lamang gihapon.
P2: Ang paghibalik sa kapasikaran. Kinahanglan nga magbaton ang Diyos og tiunay nga tigpahinungdanong katakos, ug ang tiunay nga katakos ug kasarang nagkinahanglan usab og tagdala. Igo lamang gibalhin sa "bugtong nga tigpahinungdan" ang kapasikaran ngadto mismo sa Diyos, ug wala kini makalingkawas nianang sulirana.
K: Kon amgid, sama ug mao lamang sa iyang pagkamao ang pagbuot ug gahom sa Diyos, ang mamugnaong pagbuhat mao mismo ang pagkadayag sa pagkamao. Nan ang lukopngatanan mahimong pagkadayag sa pagkamao sa Diyos sa samang paagi nga ang bidlisiw mao ang pagkadayag sa adlaw. Ug mao kini ang gilikayan sa ex nihilo.
Nan, pakyas gayod ang ikatulong bitik, naunay kini og kalukapa sulod sa iyang gambalay gamit lamang ang kaugalingong pagtuo ug baroganan sa kakaraanang teyismo.