ANG BAHAKHAK SA PANGAG

james bond's picture

 
ANG BAHAKHAK SA PANGAG
 
“Bwa, ha, ha, ha” Nadapit ang pagtagad ni Irish sa dakong bahakhak samtang naghuwat sa iyang order nga pagkaon sulod sa karenderia ni Insi Terya sa dalan Balintawak sa dakbayan sa Sugbo. Gisuhid niya ang gigikanan sa dakong bahakhak ug nisugat sa iyang panan-aw ang tawo nga nagbarog sa may ganghaan sa karenderia.
 
“Gaw Roxanne, tan-awa ra gud nang tawo nga nagbarog sa may ganghaan. Grabe kabastos ba ana niya og bahakhak oi. Lapokon man iyang buhok nga tag-as nga nitabon sa iyang nawong. Hugaw kaayo iyang sapot nga gisul-ob ug yagpis ang panglawas. Ang iyang kabiba nga nuog pwerti ka lagom nga nahisama kalagom sa trapo sa kasilyas sa sinehan sa Colon. Gatiniil. Wala’y ligo tan-awon ang tawo timaan sa iyang pagkagukdunon og kabo ug tubig. Nangalisbo ang iyang lawas sa kalang-og sa kabaho. Pagbantay Gaw Roxanne basin layogon ta. Bag-o pa ra ba gyud ko nga nagpa-rebond sa parlor ni Boy-Bay sa may Plaridel.”, mabalak-on nga pulong ni Irish ngadto sa iyang ig-agaw nga si Roxanne nga nag-utas og kolito’g sa selpon  nga pinalit sa Carbon.
 
“He, he, pasagdi na gaw Irish. Sabaan lang na siya kun magbahakhak pero wala gyud mi makakita niya nga makig-estorya. Wala’y nakaila niya dinhi sa Balintawak sukad sa iyang pag-abot mga pipila na ka tuig ang nilabay. Naa na siya magkatulganan sa aseras. Magpangayoan lang og pagkaon dinhi sa tindahan. Ang among pagtuo, nataptan na og sakit sa nerbyos. Ang uban pud nangagpas nga siya nasubraan sa ginadili nga drugas. Duna puy pipila nga nagtuo nga siya napasahan sa gutom. Ay da. Pasagdi na siya oi! Hala magkukabildo hinuon ta bahin sa imong pagpuyo didto sa tinipong nasud sa America. Si Jeremy ang imong nahibalag sa Facebook nga nahimo nimong bana, asa man ron?” pusot-pusot nga mga pulong ni Roxanne.
 
“Bitaw gaw Roxanne, ania nagpabilin nga guwapa bisan niay nitapot na nga ginagmay’ng kunot sa akong agtang. Si Jeremy sugarol lang gihapon. Kanunay lang magduka-duka, wala’y tulog sa pamuwaw sa majongan. Dali ra gyud kaayo ang panahon. Ang napulo nako ka tuig nga pagpuyo sa gawas sa nasud mora’g dali ra kaayo. Karon ania nagkakita ta, he, he.” himuot kaayo si Irish.
 
Nahanduraw ni Irish ang panahon sa wala pa siya makalarga sa gawas sa nasud uban sa iyang banang Negro nga si Jeremy. Iyang nahinumdoman si Tiago. Ang bohemyo nga kanhi silingan niya sa Duljo. Dili pilian si Tiago ug dili maihap ang mga babaye nga niagi sa iyang mga kamot.
 
“Gaw Irish, kumosta na man diay tong imong hinigugma kanhi nga si Tiago? Wala man gyud ko nimo mapaila adto niya.” Pangutana ni Roxanne.
 
“Gaw Roxanne, dugay na ang panahon nga wala mi magkita ni Tiago labi na nga nilangyaw ko. Unya naminyo. Pero dili ko kalimot niya. Sa pagkatinuod wala gyud mi magkabulag. Pero nahanaw lang to siya tungod sa problema.”
 
“Bwa, ha, ha, ha.” nagkaduol kanilang duha ang bahakhak nga ilang nadungog.
 
“Gaw Roxanne, si Tiago nawala sa Duljo human siya gipangita sa kapolisan kay nakasala siya. Nisaad siya kanako nga iya kong balikan nga magtakuban. Apan aduna ko’y ilhanan niya. Nalambigit man gud siya sa grupo nga nagbaligya og peke nga tambal sa pabaskog. Gikiha siya sa tigulang nga asindero didto sa Mindanao human makainom sa iyang tambal sa pabaskog kay kanunay na man lang gud nagtuyhakaw ang sungkod niini bisan wala’y kontra.”
 
“Gaw, Irish dakponon diay to si Tiago?” mabalak-ong pangutana ni Roxanne. Niining panahona, ang bulingit nga nagbahakhak duol na kaayo kanila. Wala na matubag pa ni Irish ang pangutana ni Roxanne. Bugnaw nga kamot ang nikupot sa bukton ni Irish. Sa iyang pagyanghag, nagkasugat ang ilang tinan-awan sa nagkupot niya. Nangidhat kini kaniya. Hapit magsikit ang ilang mga aping sa kaduol sa usa’g-usa. Ug nakita ni Irish ang wala niya damha nga makita dungan sa lanog nga bahakhak. Ang iyang ilhanan sa kanhi hinigugma. Ang pangag. Ang tawong bulingit mao diay si Tiago nga malipayon kaayong nagbahakhak.
 
 “Bwa, ha, ha, ha.” (Kataposan)

Comments

james bond's picture

SAPATOS

 

Kanindot baya sa bation,
Kon magsul-ob kag sapatos..

Kini kanunay’ng pasinawan,
Kanang makakita masuwawan..

Sa mga limpya botas, ikaw kumpayotan,
Biton, charol, nusnos ug trapo, dili mahutdan..

Sapatos, makalipay, makapawala sa kalaay,
Sigehan nimo’g tutok, kini mamunga ug talidhay..

Sapatos, kini mahimong tagoanan,
Bahalag walay himasa sa sapatos tabonan..

Mga gitugkan ug nuka-nuka, korekong,
matag tiki, ug tagiptip, ilawom sa sapatos hapinan..

Hala, antos-antosa lang, kon ikaw
Magpunay ug kinto, murag iti natumban..

Kini timailhan, kon tatak, Ferragamo”gipahayagan,
Imong giuran uran, dili ka mahimutang, palibot panid-an..

Basin, sa mga walay sapatos, ikaw mabawian,
Kanindot raba, kay sa mahalong sapatos ikaw hugopan..

Magpangutana, magpanakla, hasta mga kaliwat ni Eba,
Sila moingon, “Bahala’g ubo na lay gahi, basta sapatos sinaw pa”..

Mga amiga, mamasin, maghandum, moingon,
“Ato kunong susihon, paaway sa kaka, dili ba siya agdahonon..”