Samtang naglakaw ko sa usa ka dalan nga ngiob kaayo padong sa among balay human ko sugoa ni mama ug isdang tuloy sa merkado niadtong niaging adlaw sa mga minatay, nakasugat ako ug usa ka dako kaayong iring nga itom nga gikan sa may kalibunan.
Tungod kay medyo dag-om ug walay buwan, ug wala poy makaagi nga mga sakyanan mapa motor siklo o kaha dagkong sakyanan man didto,perwting kulbaa nako. Akong gikuha ang akong cell phone nga adonay ispat, ug gipasiga ko kini aron adonay kasanag ang akong agianan.
Apan, ang nakaparat kay na-lowbat ang akong cell phone ug ang iring nga itom kalit lang nahanaw sa unahan nako. Unya, nipadayon ko sa akong paglakaw kay nihunong man ko kadyot sa dihang nakita nako ang iring nga dako kaayo nga itom pinaagi sa iyang anino. Ug mao to, nipadayon ko ug lakaw nga nagkarap-karap ko sa akong gilaktan kay ngit-ngit gyod kaayo. Gibitbit nako ang usa ka kilong isdang tuloy sa akong wala nga kamot ug sa akong tuo ang akong na-lowbat nga cell phone. Unya to, may kalit lang nga nitugpa sa akong buku-uko ug sa akong paglingi pwerti nakong lisanga gyod! Kini tungod kay ang diha sa akong buku-buko mao man ang iring itom ug iya kong gihan-an ug paak. Sa dihang padong na ang iyang baba sa akong liog, kalit niyang nakita ang akong gibitbit nga isda nga tuloy. Ug mao to, napakling ang iyang attention ngadto sa akong gibitbit nga sud-anon unta namo ni mama ug ang uban among ihalad sa mga kalag. Unya, gihatag ko na lang ang isda ug mao to pwerting kaon sa iring itom. Bisan ug wala ko mapaaki niya, tataw gyod kaayo ang kinawrasan niya sa akong tingkoy dapit. Ug tungod sa akong kalagot akong gihapak ang iring itom sa akong baratuhon nga cell phone nga na-lowbat ug naigo ang tangkugo sa iring itom samtang nagkaon kini. Ug mao to, akong gidala ang dakong iring itom sa among balay ug among giadobo ni mama.