Pag mangukay na gani akong mama sa una malingaw ko magbagnos sa dulaan nako nga matchbox sa salog sa ukayan. Murag mga gagmayng kalsada ug eskina ang mga gintang sa mga tiles nga gipatsingan ug grout. Maglampaso-lampaso ko sa de ligid nga dulaan aning laray sa mga baldosa, magpurot-purot akong simod pagsuon sa tingog sa makina, pautongon kog taas nga ugong akong tingog nga daw akselerador.
"BRAAAAMMMM BRAM BRAM BRAM BRAM BRAM BRAAAAAAMMMMM"
Mopatiliis kog iyagak.
"SCREEEEEEEEEEETCH SSSTTT EESSTST"
Mahimuot tong tindera nga nakurat sa akong utong.
Mohunong kog kalit. Motuyhakaw, mangita kay mama ug mobalik rapog hakop sa dulaan inig matino nga wa ra siya nawagtang.
Nagkamulo among aktibidad, siya gabudlay ug pamilig mga sinina samtang ako nagpuliki pod ug gabas-gabas sa akong duwaan.
Pila ka gutlo ko nagbalik duwa-tuyhakaw balik napod tuyhakaw-duwa hangtod gibati nakog kapuol ug kahawoy sa tiil ug kamot sa akong pag kamang-salom sa salog. Giduol ko na si Mama nga daghan nag gisipit sa iyang ilokan nga mga sinina niyang napilian. Gibitad ko iyang tisirt nga kolor lila. Giusban nakog bira Kay waman ko gipanumbaling. Niabot nakog kalaay mao gibunlot na nakog sagunson iyang sinina mao gitagad ko niya.
"Aguy naunsa naman kang abata ka, kabulingit na ba nimo?"
Gihapak niya akong sampot ug nikuot sa labakara sa bulsa sa iyang palda. Paghuman gidabodabuhan na niyag pahid sa iyang nuog nga Good Morning akong nawong nga napunog sip-on nga nayutik sa mga abog gikan sa salog.
Napaling-paling akong ulo kada nusnos ni mama sa panapton, bisan gipugngan niya akong tingkoy molugnot nako kay hapdos naman iyang paglugod.
Unya nalimpiyo na ko, nakabayad na si Mama sa iyang pinalit mogawas namig ukayan magsugod pagbaktas paingon sa paradahan. Gahupot kos kamot ni Mama ug ang isa gahawid sa akong dulaan nga ipalutaw-lutaw ko sa hangin ug magsugod napog utong, iyagak akong tingog.
"Broooommm brom BRAM BRAM BRAM BRAM"
"SCREEEEEEEEEEETCHSSSS"
Samtang galingaw kog dula mabatyagan ko nalang naa napod mi sud sa ukay-ukayan. Nakabig napod diay akong Mama sa naagiang tindahan. Niadtong tungura, ang eksena mobalik sama sa ligid sa akong dulaan.

Gatuyok.

1984 kadto nga nitala sa akong panumduman ug karon Dos Mil Baynte Singko na kaluoy sa Ginuo buhi pa akong Mama. Akong duwaan hagbay rang gikaon sa dunot ug taya. Nahanaw napod tong tindahan nga ukayan nahulipan na ug laing tigbaligya. Akong anak duha ulitawo na puyra buyag pareho himsog. Tulo ka libot nalang sa orbit sa kalibutan mag singkuwenta nako. Undang nag pangukay akong inahan ug maoy nipuli akong kapikas sa kinabuhi. Magbalik balik ra gyud ang tanan. Samtang mangukay akong asawa utong nakog hinulat lingkod sulod sa sakyanan nga nakaparada daplin sa dalan. Akong ugong puro na pamalikas tungod sa tagbaw nga pagpaabot kanus-a siya mahuman. Owaw napod ikuligi kay di naman ko bata. Mag ulyahot nalang ko sa hilom kay mabawi man pod akong kalagot inig abot niyang magbitbit na sa puto sikwati nga maoy akong kinaham.
Karon samtang nagpaabot ko niya gikuwadro sa akong sayd mirror ang eksena sa bata nga nagpalitaw kutaw sa iyang sakyanan nga dulaan. Gapurot purot sa iyang ngabil, giawat ang ugong sa makina ug akselyetor. Gahupot pikas kamot sa iyang inahan nga dunay gisigpo nga ukay-ukay.