Agoy, wala damha, kining panghitaboa
adunay kana’y laing igkita
apan, dili mabalaka, dili tika ihikaw
kalipay nimo, apilan ko og sayaw.
 

Uy, ayaw na, ayaw na’g lingi pagbalik
Lubak ang dalan, dapat ikaw mag-inabtik
Basin dili mo makab-ot o maabot
imong panaw nga dugay na nimong gipaabot.
 

Pagsadya, gawasnon na ang imong kalibutan
wala na’y babag, ikaw na ang hari sa imong gingharian
Ug ako, kansang kawal nga gibuhian
mo marsta paingon ngadto sa kawanangan;
 

Ug daw sama sa peyon, usa ka tikang matag adlaw
wala may gahom, apan adunay kaisog sa paglantaw
nga modasdas paingon sa awaaw
diin, lig-onon kini sa mga pagsuway aron mahimong mahait daw bangkaw.

Busa, ayaw. Ayaw paghunong, padayon.
Barogi ang desisyon, ayaw usiki ang panahon--
sa pagbubo sa patayng' alugbati.
kay ang patay nga pagbati, dili na mabuhi.
 

-Donz 05.17.2023

"Patayng' Alugbati"