budyong serina sa baradero,
timailhan alang sa paniudto,
nanghugas na ang lapoy'ng mamumuo,
andam miabot na ang hatud mo,

abli sa timbrera nga adunay kan-on,
huwad sa linaw-oy'ng utanon,
daw baha ang sabaw mipalangoy sa kan-on,
kay pobreng mamumuo lang intawon,

unsa ba ang among gimugna ug giayo,
dagkong barko apil pa estranghero,
nga sa mga tawo ug produkto,
mao ang mubalhin gikan dinhi ngadto,

apan kami kanunay nagpabiling mamumuo,
gihigot sa kawad-on ug wala nay asenso,
igo lang mohapit namo ang among sweldo,
kay igo ra ibayad sa naghuwat nga tigpatanto,

kamahal sa palaliton, kaubos sa suhulan,
mahal nga bayranan sa mga tunghaan,
misamot kadato ang mga adunahan,
ang mamumuo nagpabiling gipatiran.

aduna pa bay sulbad mga kauban,
kini karon ato nga kahimtang,
kung anaa, unsa man,
maghiusa buntogon kalisdanan.