Mahimo Ba

Mahimo ba nga mupabuhagay ako sa akong pagbati?

Nga dia sa akong panumduman nagpahipi

Hinaot nga ikaw dili kanako magmakuli

Ang tiunay nga anaa sa dughan mo palihug ako tug-ani

Mahimo ba kon magkuyog ta bisan usa ka adlaw lang?

Sa tinuyong pakig-higalaay kita mabugkos

Dungan sa tiunay nga pagsalig ug pagsinabtanay kita malamdagan

Sa atong panag-ambitay unta dili kini matapos

Mahimo ba nga kab-oton ko ang langit alang kanimo?

Ang mga bitoon ihalad sa walay pagduha-duha

Timailhan sa labing taas nga pagsalig nga imong gihatag kanako

Palabihon ta ang higayon nga gitagana

Mahimo ba nga magkapa-kapa kita sa panganod?

Kalipay nga atong gimugna dili unta malaktod

Ikaw ug ako lamang ang bugtong hiusahon

Sa panaad nga sama sa kinabuhing bililhon

Mahimo ba nga hupayon ko ang imong mga kaguol?

Pinaagi sa kukabildo ta tin-awon ang mga kalaay ug kapuol

Maulian ra unta nako ang imong naandang kamaya

Pagkanindot gayud kon makita ko sa imong panagway ang tumang kasadya

Mahimo ba nga ikaw akong ikauban sa tibuok kong kinabuhi?

Alang kanako ikaw usa ka himayaong bahandi

Hinaot dili mo isalikway ning mga pulong nga akong gibatbat

Ug kanimo lamang ako gusto nga iagak.