Wala na mahibalo si Capt. Garciano unsa pay angayan nga isulti ngadto sa misis nga ganina ra gahilak sukad giingan niya kini nga patay na ang bana niini. Dungog sa tibuok opisina ang dangoyngoy sa babaye sanglit cubicle divider ra ang nagsiparar sa puwesto ni Capt. Garciano sa ubang mga kawani. Ang paghatag sa di maayong balita, ang usa sa mga katungdanan ni Kapitan nga wala jud niya magustohi, apan gikinahanglang buhaton sa usa ka Fleet Manager nga sama niya. Gisaad niya, nga sa sunod, simbako lang, kung may pareha ani gihapon nga mahitabo, mangita na jud siya og laing tawo nga mobuhat niini. Maluoy siya sa misis, pareha aning naa sa iyang atubangan karon, kuyog-kuyog ang anak nga babaye, 3 anyos pa, nga may kahibulong sa nawong, may pangutana, wala kasabot nganong mihilak ang iyang inahan. Second mate sa barko ang bana sa babaye, nadisgrasya kini, ug basi sa pahiunang imbestigasyon, naipit kini sa milabyog nga pangarga nga niadtong panahona gibira sa CRANE duol sa iyang gitindugan, wala makalikay o makabantay ang maong seaman tungod kuwang kini sa tulog, dire-diretso man gud ang cargo operation niadtong panahona, ug 26 oras na ang milabay sugad sa iyang uwahing pagtulog. Wala na siya sa iyang saktong panimuot, sa iyang saktong disposisyon.
    "Misis, sa karon, ang among mabuhat agig tabang kay ang pag-agak kanimo aron makuha nimo ug madawat ang tanan mga benepisyo nga para sa inyoha, " ingon ni Kapitan.
    "Sir, hu hu hu, di kabayran ang kinabuhi sa akong bana, hu hu hu, kinahanglan namo siya, " tiabaw sa misis.
    "Kasabot ko sa imong sitwasyon misis, pero di na nato mabalik ang kinabuhi sa imong bana, dawaton ta kana, ang atong hunahunaon karon ang inyong kahimtang, ikaw ug ang inyong anak, nga naa moy magasto, sa karon ug ugma, di ba?" kalma nga pagkasulti ni Capt. Garciano.
    "Kaluoy sa among anak, Sir, modako intawon ni nga walay amahan, hu hu hu,"ingon sa misis, "kadaghan pa bara sa among utang Sir. hu huhu..."
    "Sa tinuod misis, wala pay labot sa insurance ug sa inyong madawat gikan sa OWWA, makadawat mo og 50, 000 gikan ni sa company basi sa POEA contract," ingon ni kapitan.
    "50, 000 Sir? igo ra intawon na pambayad sa among mga utang," tubag sa babaye.
    "Dollars ni Ma'am, fifty thousand U.S. dollars," giklaro ni kapitan.
    "Mao ba Sir? Sorry, abi nako og pesos," ug mihunong na sa paghilak ang misis. Gitrapuhan ang nahibilin nga luha sa aping, nanghupaw, dayon nanghinuktok kadiyot ug kalit milingi. "Sir, pwede manghulam og calculator." THE END