Tagasyudad na ko ron nag-inusara pagduaw
sa lapyahan dinhi sa amo nagpabugnaw
kay nagmahayay nanag-ilugay sa karang balay
human namo ikalubong si Nanay Biyay.
Kaniadto managsuon manglukso nianang bato
mosalom magtampisaw hangtud tingpaniudto
bisag manglagom na morag si Agta Kadyo
ug kon hapit na gain mosalop ang kahaponon
manguha mi dinhag daghang kinhason
magkalapok gud magkagukam og lukdo
sa bukong ngat punog aninikad ug bakuko.
Taudtauod nahupayhupay na kining dughan
pagsud-ong sa hapsay-linaw nga kadagatan
may batang babaye sa unahan nagpungko
balaybalay sa balas gihimoan niyag tapangko-
Unsang pangandoy ang iya dihang giluko?
May bata sab nga lalaki duol anang sakayan
nanghulbot man kaha siyag mga ulapihan—
unsang paglaom ang iya unyang mapingwitan?
Human, gisukot ko ang kanhi kong yaya
kon kinsang ugod kadtong mga bataa
taga-silingang baryo kuno sa Canbanua—
si Ceclia kansang mama atua sa Saudi
ug si Joaquin kansang papa napriso pirmi
Sama kanako diay ang karaang lapyahan
Ang kanila usa usab ka dagpanan—
Ang bakuko, bulas u gang ulapihan
Maoy mga dulaan sa nagmingaw namong handurawan.