Alang Sa Akong Bag-ong Higalang Babaye...(29 April 2011)

Tue, 05/03/2011 - 18:54 — Wail

Alang sa akong bag-ong higalang babaye…

Sukad adtong nakita tika

Mibati akong dughan ug kasadya

Nagalaum ug labaw sa umaabot ta

Manindot nga higayon sa atong panagkita

Makabibihag ang imong katahum

Puno sa kamaya ug pahiyum

Kaanyag nga dili mabintaha-an

Apilan pa sa putling dughan

Midayeg ako sa imong pagka-mahigalaon

Pamatuod sa kinaiya mong bililhon

Sa kadaghanan gimahal ikaw

Daw sama sa perlas nga migimaw

Susama ka sa bitoon sa langit

Nagdala ug hayag sa kinabuhi kong mangitngit

Susama ka usab sa adlaw nga naglagiting

Ang kainit niini mupahumok sa galamhang mikaging

Tam-is buyag ang imo panagway

Makapahikbi kanako sa hingpit nga kalipay

Kon mag-istorya ta, mahanaw akong mga kalaay

Ang akong pakighigala kanimo di gayud nako ikamahay

Tumang kasadya ang imong ambit kanako

Bisan pa kon nagkaila lamang kita ning bag-o
Sa ngalan ni Bathala, akong isaad ning tiunay nga panaghigala

Alang kanatong duha, sakmiton ta ang mga hiyas sa gugma ug panaghiusa

Inig abot sa higayon nga kita magkakuyog

Paninghuaon kong mahimong mabulokon ang matag takna nga mulabyog

Abton ta ang labing taas nga bahin sa langit

Ug saw-an ang himaya nga hingpit

Kining panaghigala ta himuon tang bahandi

Ug ang pagsalig ta maoy himuong bugti

Ang panaghigala ta himuon tang hiyas sa tipiganan

Ug hinaot nga kini molungtad paingon sa kahangturan.

pahinungod alang kay Ms. Marelyn Inojales Martinez, sa Caluasan, Dagohoy, Bohol ug Gaisano Grand Mall, San Jose, Antique:-)

Navigation