8 trucks ‘gisunog’ sa NPA

Arjay S. Felicilda, Caraga Regional

BISLIG City – Gisunog sa gitoohang ginsakpan sa New People’s Army (NPA) ang lima ka dump trucks ug tulo ka saddam hauler trucks nga puno sa coal minerals, hapon sa petsa-singko ning bulana.

Matud ni P/Supt. Martin Gamba, info officer sa Police Regional Office (PRO-13), nga sa wala pa ang hitabo, giharang sa wala matinong gidaghanon sa mga ‘rebelde’ ang nahisgotang trucks sa Road 5 ug Road 6, Sitio Sikahoy, San Jose ning dakbayan ug gimando-an ang drivers pagsulod sa Road 73, Brgy Pamian, Lingig, Surigao del Sur.

Pagdangat sa Km. 21, Brgy Rajah Kabungsuan, Lingig, ila dayong gisunog ang maong trucks.

Niadtong higayona, ang nahisgotang trucks nagpadulong unta sa sentro sa dakbayan gikan sa mining area sa Bislig Ventures, Brgy Panaypayan ning dakbayan.

Sa pagka-11:00 sa gabii sa mao gihapong petsa, ang walo ka drivers gi-release sa mga ‘rebelde’ ug walay tatsang nakapauli sa opisina sa Bislig Ventures nga nahimutang sa sentro sa dakbayan.

Sa imbestigasyon sa kapulisan, milutaw nga ang Bislig Ventures wala misugot sa mga demanda sa NPA. Dili tin-aw sa report kung unsa ang mga gipangayo sa NPA gikan sa nahisgotang kompaniya.

Sa pagkakaron, gipangita na sa kapulisan ang mga responsible, nagkanayon si P/Supt. Gamba. (uban sa report ni PO2 Darlin Cabalinan-Migullas, Duty PNCO)