Naglakaw'ng way saplot
wala nay kabuot
nangita na'g gubot
magstorya nag' bot-bot
kung sabyan, mosamot
kung suphon, mapungot
demonyo maglagot
gakayo ang kamot
kay gidali'g hurot
kabayong gisingot
ang bulsa nabuslot
hubog na ang piskot!

"Hubog na ang Piskot!"
-Donz 07/20/17

Nakita ko na ang dalan
paingon's kamatuoran
nga labong murag daruhan
apan, dagha'g apan-apan
simbolo sa kagawasan--
paglayat's wa'y kahumanan
atong pagahinumduman
sa pag-abot's paingnanan
mahanaw ang tanan-tanan
mabilin ang kasayuran
nga ang dalan naa's dughan.

"Ang Dalan"
-Donz 07/20/17

#TheWay 

Mga tanom sa kayutaan
mabuhi kon pagabubu-an
mamatay kon putlo'g pasagdan
daw kinabuhi sa katawhan
mabungahon kon naa'y hinungdan
usik kon walay paingnanan
daw pagpananom's kabatuhan--
walay silbi; wa'y kapuslanan
apan kon adto sa daruhan
bisan pa og yatak-yatakan
di mausap ang kapalaran
sa taw'ng nagbuhat's kaayuhan--
magtubo hangtod's kahangturan.

"Tawo ug tanom: Ang Kapalaran"
-Donz 07/20/17

Kalipay maoy ganti sa kaayuhan
Kaalam maoy ganti sa kadautan
Ingon ana ang gaba sa kalibutan--
kapalaran nagdepende's binuhatan
kung ang mga tawo imo rang pasakitan
dili ka mahimutang sa pagbangutan
hangtod sa maghinulsol ka's kasal-anan
ug mabayran gyud nimo ang tanan-tanan
kay mao kana ang tumoy'g tumong's tanan--
kung aduna ba gayud kay nakat-unan.

"Gaba"
-Donz 07/20/17

#KarmaVipaka