Edukasyon, Gradwasyon Ug Kaugmaon

Genamos_US's picture

Edukasyon, Gradwasyon Ug Kaugmaon
By Genamos_US of Washington DC, USA

Motikang na gani ang buwan sa Marso
Mga gradwasyon maoy dakong uso
Mga mogradwar sa intamblado mopaso
Aron modawat sa diplomang ipasagarbo

Ang gradwasyon usa ka selebrasyon
Pahalipay sa nakab-ot nilang higayon
Mga dughan gipuno sa dakong kalipay
Kalampusan bisan adunay mga kabudlay

Ang diploma maoy timaan sa ilang kakugi
Kakapoy, sakripisyo ug paningkamot lagi
Dili kahulipan og salapi ang ilang nakab-ot
Mga ginikanan ug migradwar sila nahimoot

Ang edukasyon maoy sakayan sa kalamposan
Salamin sa dakong kaayohan para sa tanan
Dili usik-usikan ang panahon kay gadagan
Kay ang oportunidad mulabay kausa ra man

Dili sayop kun mangandoy kitag kaayohan
Labi na sa pamilya, kaugalingon  ug sa uban
Kay libre ra kanato gihatag sa Dios Amahan
Kagawasan nga dili kinahanglan og puhonan

Walay luna mabutangan sa kasingkasing
Sa kalipayng gibati sa ginikanan nabaling
Kon palaron ang kaugmaon mosalingsing
Kay ang kinabuhi naga-uswag bisag gamiting

Ang gradwasyon dili kini ang katapusan
Sinugdanan lang kini sa atong kadamgohan
Panahon nga motan-aw nata sa atong ugma
Planohon ang kinabuhi ug dili nato ibaliwala

Busa dili kita mawagtangan sa paglaum
Kon nahidagma kita mobangon sa hilom
Magpadayon sa pagpaningkamot ug kakugi
Aron ang kaugmaon nindot ug adunay bili

Comments

Edukasyon

Mulambo gyud ang kinabuhi sa tawo tungod sa saktong edukasyon. Maskin pag pobre o bulahan basta maka-eskwela ug makalampos dako na kaayog kahiusaban sa kaugmaon sa tawo kay makakita man gyud ug nindot nga trabaho sa ugmang damlag. Mahiingon pa sa mga katiguwangan nga magtarung sa pagskwela kay kita-kita ra gihapon ang makaamgo sa nindot nga paghuli ug dili man gyud daw ni makuha sa laing tawo ang atong na skwelahan kay lage ato maning gipaningkamotan ug gikahaguan sa mga ginikanan.

Mao ning kada tungtung sa Marso, hilabihan na sa gakolehiyo nga padung na mu gradwar kay manghilak gyud ang mga ginikanan kay makakita na sa ilang anak nga mupaso suot ang togang itom. Mao ra biya intawn ang pangandoy ning atong mga ginikanan. Bahala na magkainutang basta sa kaugmaon sa anak nga mao lang ang timaan sa ilang walay kaundangan nga pagmahal. Igo ra gyud ang pagpangandoy ug taas kay wala may mawala basta mag tinarung lang ug hatagan sa pagtagad ang edukasyon.