Ug ako miuli na sa hingpit

Dinhi sa yuta kong natawhan

Gumikan kay ang huyohoy misampit

Nga kining dapit akong alagaran

Human ako nagtigum ug kaalam

Nasaksihan ko pag-usab ang katawhan

Nag-hilaid gihapon sa kalisud

Kining kahimtang hangtud na lang ba sa hangtud?

Mihunghung ang akong dughan

“Abagan mo sila”, matod niini

“Kon mahimo kang alagad sa kausaban,

Sugdi na kining masanagong mithi”

O Totolan, minahal ko, Lingkawas, lingkawas!

Panahon na alang sa paghaw-as

Dili na kita magpagapos pa

Sa malinawong paagi maghugpong kita!

Armas sa kaalam ug kugi ang atong gamiton

Pinaagi niini kita magmabungahon

Si Bathala ug ang katawhan atong kusog

Wa’y kahadlok kitang mubarog

Ang kalampusan mabatyag lamang

Kon magkahiusa ang tanan

 Duyog sa kamaayo ug tinguhang putli

Mga butang nga mahikawan dili

Sama sa binhi nga misulbong

Palapdan ang dalaygong katarong

Magsugod ang kausaban una sa kaugalingon

Paingon na sa katilingbang naghandum

Ang kapalaran nato usbon na

Ngadto sa mabulukong himaya

Matag gumunhap asdangon ta

Bisan pa sa tanang mga pagpasipala

Panahon na nga tinud-on ang matag damgo

Paghan-ay sa mga hiyas nga maanindot

 Kaangayan ug kinabuhing bag-o

Mga hiyas nga mahimo tang makab-ot

Sa pagkaplag ta sa bag-ong adlaw

Ang labing madanihong kaanyag mupatigbabaw

Kalambuan ug kalipay karon mugimaw

Sa minahal tang Totolan—ang bililhong labaw!!!

ABANTE DEMOKRASYA!!!

Mabuhi ang katawhang Dauisanon!!!