mayo trese, dos mil trese.

adlaw sa piniliay ug tinaktakay

sa balota, ang lapis ipabagnod

sa gamay karton ang balota ipasalipod.

pilia higala ang sakto ug kwalipikado

ang matood ug angayan nga kandidato

i-asa man lagi ang kasikat ug katisoy

kung dili kamao nya magsige na lang nya ug panaghoy.

pilion ta ang maayo nga lider

lider nga maoy manguna 

ug dili ang magpunay lang

ug mandar, murag commander

sa piniliay karon nga moderno

dili lang unta ang pikos ang mauso

kung dili - ang pagpauso ug pagbag-o

sa kinaraan tang stilo.

Gamayng salapi ayaw'g kahiwi

nungka ampingi ang imong boto isip usa ka bahandi.

ayaw'g patorbar, ayaw'g kataranta!

pausohon ta ang piniliay nga walay kwarta.

kung ugaling malas ang atong manok 

atong likayan ang pangbulabog ngadto sa dumadaog

hinoon - mosuporta ta, kay siya mismo

nagkinahanglan kanato aron kita mahiusa.

mga higala, oras na!

para nga kita magkahiusa.

dili para sa usa ka kandidato

kung dili para sa usa ka lungsod ta'ng mo-asenso.