(Para Kay Ikatulo)
 
Sa pagsapit sa kabuntagon.
Dili nako malimtan na mutan-aw sa kalangitan og mungisi maskin nag mura kog way buot na bata na nabuy-an ang sapi-sapi.
Naguol samtang nalipay. 
Makahinumdom ko sa imong tingog, ang masadyaon mong mga pulong nga nagsangpit sa gugma nimong matinuoron.
Dili nako makalimtan na mutan-aw sa kalangitan og mungisi, nangandoy na sa kapanganoran makita tika nga malipayon.
Sa akong paglakaw sa adlaw,
ang mga hangin ba na nagadaplis sakong aping, imohang mga hagki para magpahinumdom sa ako na anaa ka sa maayong lugar?
Ang mga ulan ba sa hapon nagasangpit sa imong kamingaw sa imong mga hinigugma?
Ang mga paru-paro ba nga nagalupad sakong atubangan imong mga pahinumdom na anaa ka sakong tapad?
Nag-ilusyon ba ko?
Kada-adlaw, mahinumduman nako ang mga ngisi nimo kauban sa imong mga mata nga gasidlak-sdilak.
Hangtod karon natingala ko, kung unsa jud ang pasabot atong imong mga tutok.
Ang paghawid nimo sa akong kamot na kanunay gahatag og kahilwasan.
Ang kamatuoran, magsulti gayud ako, gimingaw kog ayo kanimo.
Og karon,
Dili nako malimtan na mutan-aw sa kalangitan og mungisi.
Magpuyo ko taman-taman sa imong handuraw.
 
 
(Para kay Ikaduha)
 
Sa salumsom adtong niaging berano.
Sa maraag na kalangitan, ako nagpa-abot sa gabiing mala-kahil.
Na makita tika og maghatag sakog mga pahiyom og katawa.
Sa mga tigmo na mahatagan nakog mga kahulogan.
Sa tuling nimong alimpatakan na nagtukmod sa imo pag-sulti sa imong maugdang na kasingkasing.
Nag-ila man ta nga wala gituyo ang kahigayonan, apan nagtuo ko na kinahanglan ta magkita pagbalik. Kanunay.
Ang subang dili gatugot na magpabilin ko sa imong mga mata, nga nakita ang gabii ka nako.
Dili man itugot sa panahon ning akong pagbati kanimo.
Maghulat unta ko nimo.
Ang pangutana lang nako sa akong kaugalingon.
Hantud kanus-a?
Magpabilin nalang usa ko sa imong handuraw.
 
 
(Para kay Una)
 
Adlaw. Gabii. Udto. Hapon.
Malipayon ako tong kita pang duha.
Giilog man tika sa kahayag tong una, hinaot unta napalipay tika.
Walay perpekto na tawo og wala sa'y perpekto na gugma busa gipasaylo tika sa imong mga kasal-anan og pasayloa sad ko sa akoa.
Maayuhon man ka na binata, apan naghinaot ko sa imong kabag-ohan.
Ang mga rosas naay tunok og kani makasamad, sakit og mupali.
Paga-ampingi ang usa. Ang usa na naghatag og dili gakamatay na rosas.
Nagpasalamat ko sa imong gugma.
Sa tanan.
Sa kalipay taman sa kasakit.
Sa tanan mga kanta na atong nakanta.
Sa mga hangin na atong natagbuan.
Sa mga adlaw og gabii na atong nasalo.
Wala ko nagmahay na mahigugma nimo, para masayod ka.
Og hantud sa hantud.
Itago nako ang imong handuraw.
 
 
(Ang Katapusang Pamaalam)
 
Sakit man sakong buot pero kinahanglan na gayud tingali ko mamaalam sa mga damgo na usa ka adlaw, mubalik ang imong mga pahiyom. 
Mubalik ka isa ka adlaw og mabati nako pagbalik ang init nimong gugma.
Mamaalam nako.
Kinahanglan na nako buhian ang paru-paro padung sa kahayag.
Kinahanglan na nako tika ipaubaya sa Amahan.
 
 
Nalipay ko sa imong desisyon.
Nalipay ko kay gipili nimo ang sakto.
Dili nako angay manghilabot pa kay kabalo ko na nalipay sad ka.
Mamaalam usa ko taman sa atong pagbalik og kita.
 
 
Makapahiyom kog nakadungog na nakita na nimo ang para sa imo.
Ayaw na kana siya buhia, ang rosas na imong gikabtan.
 
 
Magpadayon kog lakaw sa akong kinabuhi.
Dili malimtan.
Ang handuraw
Sa kabuntagon.
Sa salumsom.
Sa adlaw, gabie, udto og hapon