Opisyal sa POPCOM Midayig sa Katukoran sa PopDev Press
Sinulat ni Arjay S. Felicilda ug Joel C. Escol

GIDAYIG ni Deputy Executive Director Mia Ventura sa Commission on Population (POPCOM) ang Regional Population Office Region 10 (RPO-X) tungod sa pagtukod niini sa Population and Development Press Corps for Northern Mindanao (PopDev Press NorMin).

Gidayig usab ni Ventura ang ginsakpan sa PopDev Press tungod sa ilang hini-usang pagpaluyo sa responsible parenting and natural family planning (RP/NFP) program ug ubang mga kalihokang pangpopulasyon ug pangkalamboan dinhi sa rehiyon.
“Kini lain na usab nga dakong hinungdan sa paglambo sa natural family planning ug ubang mga programang pangpopulasyon ug pangkalambo-an dinhi sa Amihanang Mindanao, ug tungod kay mao may labing una dinhi sa Pilipinas, kamo maoy mamahimong modelo sa kinatibok-ang POPCOM,” pulong ni Ventura ngadto sa iyahang mga tigpaminawng taga-media.
Gipadayag ni Ventura ang iyang kompiyansa nga ang PopDev Press makatabang kaayo pagpadali sa tinguha ni Presidente Gloria Macapagal Arroyo nga ang RP/NFP masabtan gayod og maayo ug sa ngadtu-ngadto sagupon sa matag Pilipinhong magti-ayon.

Sa iyahang bahin, si POPCOM 10 director Psyche Paler nagkanayon nga ang pagtukod sa PopDev Press maoy tubag sa mando ni President Gloria Macapagal Arroyo nga palapdan og maayo ang kampanya alang sa RP/NFP sa tibook nasod.

“Kami sa Regional Population Office sa Region 10 nagtoo nga ang PopDev Press epektibo kaayong mekanismo sa paghatud sa mensahe ngadto sa among gitumbok nga katawhan,” matud ni Paler.

Iyang gibutyag nga ang Katoliko Romanong Simbahan sa Cagayan de Oro City, pinangulohan ni Arsobispo Antonio Ledesma, maoy ilang “big partner” sa subsob kaayong kampanya sa impormasyon, edukasyon, komunikasyon ug adbokasiya mahitungod sa RP/NFP dinhi ning maong bahin sa Pilipinas.
Atol sa duha ka adlawng RP/NFP Orientation and Organizational Meeting diha sa POPCOM Training Center, dakbayan sa Cagayan de Oro City kaniadtong Marso 13 ug 14 ning tuiga, napili kining mosunod isip unang mga pangulo sa PopDev Press : President Ardizon Arsua (RGMA Campus Radio), Executive Vice President Walter Balane (Central Mindanao Newswatch), Vice President for Cagayan de Oro Arjay S. Felicilda (Mindanao Forum, Kagayhaan.com Blog and Bisaya Network.com Blog, Vice President for Misamis Oriental Angelica Gorigao (Provincial Press Office), Vice President for Bukidnon Eric Cagay (MBC Love Radio), Secretary Anabelle Florendo (Bukidnon Daily News), Treasurer Delia Lapor (Catholic Radio DXDB), and Auditor Jovie Yuhoy (Radyo UMBN-Radyo Ukay).
Directors Joel Escol (Real Review Newspaper) Raul Moldez (Cagayan de Oro City Council Press), and Terry Betonio (Golden Chronicle),ug mga sakop Dante Sudaria (Mindanao Gold Star Daily), Jun Felicilda (Real Review Newspaper) and Bing Jacinto (DXIF Bombo Radyo)

Sa iyahang mensahe, gidasig ni Arsua ang iyahang mga kauban sa PopDev Press nga duyogan siya pag-atubang sa mga hagit, “kay kung wala kamo, imposibleng makab-ot ang atong mga tumong.” (asf&jce/jdelpf)