Kurdapya

Sun, 01/22/2012 - 11:42 — rastaval

Kurdapya

Takulahaw lamang nagpahipi ka sa akong kiliran.

Apan sa kapaspas sa pagligid sa mga adlaw, daw sa dali ra kini nga nataligam-an ug nahilakalimtan.

Oh Kurdapya

Gipakatoo ko nga ikaw dili ug dili mukagiw.

Ug nahisusama ako sa usa ka layang dahon sa kagahapon nga nataktak sa iyang pinoan ug sa tumang kasayon natun-as na lamang.

Akong Kurdapya

Ug kon kanus-a ka nawagtang, Nigitib ang kahidlaw sa akong galamhan.

Ug sa imong pagkahanaw, Ako nagtukaw ug sa kalit nituaw…

Kurdapya ko

Lisud na gyud diay nga pabalikon ang baha paingon sa bukid?

Ngit-ngit pa sa alkitran ang akong kaugmaon karon nga ikaw sa kiliran ko nahanaw.

Ug karon ako nag-inusara gihuna-huna ug gihandom ka, Sa pagmahay ang akong dughan wa nay kasudlan.

Oh akong Kurdapya

Karon ania sa kaugalingon ako nakigkulokabildo, bisan ug way ngabil nga mutubay ug musanong sa akong pangamuyo.

Ug sa tago ako nihung-hung ning galamhan sa mga pung nga napatik sa lapyahan sa balatian;

Mas maayo pa ang unas kay kon matandog musibaw ang tingog nga langis niyang kanaas…

Kurdapya kong hinigugma.

Navigation