Pinambit sa BisayaQuotes.com

Ning maong matahom nga kabuntagon tuguti ko nga mupaabot kaninyo ug usa ka hamubo nga storya. Dunay storya sa usa ka komunidad sa mga katiguwangan diin giplastar pag-ayo sa atong Ginoo sa usa kay malaparaisong yuta. Gibutang sila sa Ginoo sa usa ka matahom nga patag ug gipalibutan kini sa tabunok nga yuta ug mga matahom nga kabukiran. Gipuno kini sa Ginoo ug mga maayong talan-awon ug sila gihatagan ug tag-as nga kinabuhi. Nilabay ang mga katuigan apan walay nakita ang Ginoo nga pagtusbaw niining maong komunidad. Ang mga tawo wala mulakaw palayo para sutaon kung duna bay mga tawo nga sama kanila nga nagpuyo sa ilang mga silinganang lugar. Wala nila sakaha ang bukid nga nagpalibot nila aron makita kung unsa ang talan-awon nga makita gikan didto. Wala sila muhangad sa kalangitan aron makita ang katahom sa mga panganod ug sa mga talan-awon ibabaw kanila. Sa dihang niabot kining mga tawhana sa ilang katiguwangon, nakadesider ang Ginoo pag bisita kanila. Ang Ginoo misulod sa lawas sa usa ka biyahedor ug miabot Siya sa maong lugar mga alas 4 na ang takna sa kahaponon.

Iyang gipahibalo ang mga tawo nga dunay mga tawo nga sama kanila nagpuyo sa subangan, timog, habagatan ug kasadpang bahin gikan sa ilang nahimutangan. Iyang gilarawan kanila ang mga syudad nga puno sa kaprogresibo. Iyang gihagad silang tanan nga mubisita sa maong lugar apan silang tanan miingon nga “Uwahi naman, tiguwang naman mi. Imposible nga maabot pa na namo ang maong kalajoon.” Iya napud kining gikumbensir nga mutungas, musaka sa bukid aron makita ang usa ka matahom nga patag ug mga tanaman sa matag kilid niini apan usab mibalibad sila sa rason nga wala na silay igong kabaskog nga musaka sa maong bukid ug nga habog ra ang maong bukid ug basin kabuhion ra lamang sila’s taas. Miingon na usab ang biyahedor nga hala muhangad tas taas ug pamati kay storyahan ta kamo sa usa ka kinabuhi sa usa ka gingharian luyo nianang mga panganod apan sa makausa pa, mibalibad napud silang tanan sa rason nga hawoy na ilang liog ihangad-hangad ug nga lisod na para kanila ang pag timaan ug pagsabot sa mahimong storya sa maong biyahedor. Nihangyo na lamang ang biyahedor sa katapusan sa pag-ingon nga “Na hala, manganta ug manajaw rakan lamang ta para mahimong puno sa kasadya kining hapona.” Apan mitubag lamang ang mga katiguwangan nga “Na pasawop naman ang adlaw, manguli name sa among barong-barong kay basin magabhian mi.”

Tungod niini mibalik ang maong biyahedor sa iyang agi nga masulub-on. Nisulti ang biyahedor sa iyang kaugalingon nga kung kuhaon pa lamang sa tawo ang mga pulong nga uwahi naman, dili, layo, habog ra, imposible, lisod, di na masabtan, siguro ang kinabuhi sa tanang tawo sa kalibutan mamahimong malipayon. Ila unta nga masabtan nga walay nauna ug nauwahi niining kalibutanan kundili ang tanan sinugdanan lamang sa lain-laing gasa nga mahimong ihatag sa kinabuhi sa matag usa; nga ang kabatan-on mahimong magpabilin diha sa atong tagsa tagsa nga huna-huna bisan sa sa unsa nga pangidaron nga atong maabot; nga dili babag ang katiguwangon para mahimong kaparte sa pagpalambo sa usa ka sosidad; ug nga ang pagbag-o sa mga dili maayong gawi usa ka importanteng butang labina para sa mga tawo nga naa na sa kahapunon sa ilang tagsa-tagsa ka mga kinabuhi.