Sukad sa akong pagmata, ako nakapangutana ug daghang mga pangutana nga ang uban sayon tubagon sa akong kaugalingon, apan ang uban lisod para huna-hunaon man lang. Sa bata pa ko, wala gayod ako nahibalo kung asa naggikan ang tao, giunsa paghimo ang kalibotan, kinsa ang naghimo niining tanang mga butang nga makita ug dili makita dinhi sa kalibotan nga atong gipuy-an. Ang ako lang nadumdoman samtang nag-eskwela ko sa Elementarya, adunay mga alamat kung giunsa paghimo ang kalibotan, ug nabasa pud nako nga gitudlo sa libro nga siyensya kung asa kita gikan. Sa akong pagsimba kaniadto ako nagsugod ug tuo nga adunay Ginoo nga nagbuhat kanatong tanan ug niining kalibotana, apan dili klaro kanako ang pagsabot nganung anaa man kita manluluwas, ug nganong kinahanglan mang maluwas ang mga tao sa mga sala? Ug nabalaka ako sauna kung gidungog ba sa Ginoo ang akong mga pag-ampo kay pila ka beses ako magpangutana sa akong kaugalingon nganong wala dungga ang akong mga pangamuyo, ug kung gidungog man galing ang uban pero wala ako mahibalo niini. Karon akong ibahin kaninyo ang akong kaagi. Unta dili kamo mangahiubos kung makasulti ako ug mga butang nga lisod dawaton sa inyong mga kaugalingon. Ang akong ibahin dinhi mao lamang ang kamatuoran sa akong kinabuhi nga nakaplagan.

Ako usa ka babaye nga may gamay nga kaalam sukad sa pagtuntong nako sa Grade 1, dali rako makasabot sa leksiyon sa eskwelahan. Ikaupat ko sa siyam ka mga magsoong lima ka babaye ug upat ka lalake. Ang akong mga ginikanan pobre lamang, panday akong amahan ug naa lamang sa balay nagtabangtabang ang akong inahan. Sugod sa akong pag-eskwela akong nalantaw nga ang akong pamilya naglisod, ug dungagan pa sa mga dili saktong prinsipyo sa akong amahan. Kugihan ang akong mga ginikanan, apan kung naa na gani abot nga kwarta sa palad sa akong amahan, o bisan wala pa gani mahawiran ang abot sa ilang paningkamot, kini mahurot lamang ug kulang pa sa utang sa mga imnunon samtang makig-inom siya kauban ang iyang mga kompare ug kung nay muabot nga mga bisita. Ang iyang prinsipyo maulaw kung wala siyay kwarta ikagasto sa pag-inom kay basin kunuhay makaingon ang iyang mga amigo nga siya hakog, puno siya ug garbo nga wala nabutang sa lugar, ug seloso pa gayod. Adunay mga panahon nga muadto sila sa laing dapit ug biyaan lamang kami ug dili saktong bugas para dung-agon, maayo na lamang anaa gihapon naglantaw nga akong mga paryente sa duol ug mga silingan. Usahay makahuna-huna ako kung naa bay Ginoo nga gisimba ang akong amahan kay wala kami nakakita nga siya nisulod ug simbahan sa taas sa bungtod gikan sa among balay. Ang akong nakita, adunay tradisyon nga ginasunod kasagaran sa mga katoliko nga gisunod usab sa akong pamilya, mga paryente ug mga silingan bisan tuod dili mga katoliko. Mangamuyo ang akong amahan sa mga pagkaon nga gihanda para sa pagsaulog sa anibersaryo sa kamatayon sa among mga paryente nga nangamatay na. Pagkahuman pagpangamuyo iyang kuhaan ang kada usa sa mga pagkaon ug ihulog kini sa lupa. Ako naghuna-huna kung tinuod ba ang iyang gipangamuyo kaniadto. Haw-ang kaayo ang akong pagtoo sa Ginoo apan interesado kaayo ko makabalo unsa gayod ang tinuod nga kaluwasan sa tao. Pila katuig milabay, ako naghandom gihapon unsaon nga ako makatabang sa kalisod sa akong pamilya, mao nga bisan naa sila mga kamalian sa ilang mga tinuohan, akong nakita nga sila naningkamot para bisan man lang ako makaabot ako sa High School, ug bisan pa hapit ako makahunong sa panahon nga anaa na ako sa kataposang tuig para makatapos, tungod kay gusto sa akong amahan nga paapason ako sa Manila sa akong inahan ug sa akong igsoong babaye nga nagsunod sa ako.

Makaingon ako nga ang Ginoo naglantaw gayod, ug ako nagtoo nga anaay rason nganung ang misunod nga nahitabo nakatapos ako sa pag eskwela sa High School, ug nakauli ang akong inahan ug igsoong babaye gikan sa Manila. Adunay niabot nga sulat usa ka adlaw gikan sa laing nasud nga wala nako gidahom Ug niabot ang panahon nga tapos sa among pagkaila pinaagi sa sulat, nianhe siya sa Pilipinas, namenyo kami, ug niadtong tuig 2007 nianhe siya ug balik ug nagdesisyon nga dinhi na magpuyo. Daghang mga panghitabo ang nakapaotro sa akong pagtoo sa Ginoo ug pagsalig. Ug nakahibalo na gayod ako sa tinuod nga kaluwasan ug kung unsaon ang maluwas, ug unsa kanang untop nga pagsalig sa Ginoo. Ako kining ibahin kaninyo matapos nako mabasa ang Ingles nga bersiyon sa Bibliya, nga mao ang kamatuoran mahitungod sa kaluwasan sa Tao, mga Sugo sa Ginoo, ug ang Iyang mga gipagbawal sa tao para makaadto sa Iyang Gingharian nga walay kataposan. Ako kining ibahin kaninyo sa sunod nga artikulo nga akong buhaton. Pero timan-i ninyo kini nga adunay kagawasan sa malisod nga kinabuhi dinhi sa kalibotan kung ang tao makabalo unsaon ang maluwas sa mga sala, ug kung kinsa gayod ang Usa ka Tinuod nga Buhing GINOO. Daghang salamat sa pagbasa niini nga artikulo.