Ang Kagahapon
By Genamos_US of Washington DC, USA

Lab-as pa sa akong panumduman
Kadtong nilabayng katuigan
Kay wala ko masayod kung asa ang sinugdanan
O kaha diin ang mga utlanan

Nilabay ang mga katuigan
Ug ang dughan ko padayon nagbangutan
Kay sa kagahapon kanunayng gipugngan

Ngano kaha lisod kini buhian?
O kaha padayon kini gipahimoslan?
O Dili ba kaha giduyan lamang kita sa mga kalisdanan

Sa imong paglakaw
Dughan ko nakapanghupaw
Nahunong ang mga damgo tang gilaraw
Kay sa mga saad kita gimingaw

Didto sa daplin baybayon
Akong gisubay ang mga tunob sa akong handumanan
Aron handomon pag-usab ang mga kagahapon
Inubanan sa mga hinogan-ob sa mga balod

Gipadpad sa akong panumduman
Kadtong singsing nga imong gibuhian
Nga kanimo gidawat niadtong nilabyng katuigan
Wala ko damha nga mao diay ni ang dangatan
Sa nagun-ob kung kalibutan

Gugma og Pagsalig sa kanunayng giatiman
Aron kini mulambo sa mga katuigan
Pagka-anogon sa mga saad
Nga kanako walay paglubad

Imong Gibuhi-an nga nilupad
Gikan sa imong bugnawng mga palad
Pasaylo-a ako kung ako man ang nasayop
Sa kagahapon kita gihigop

Buhi-an ko na ikaw karon
Ug tak-upan kadtong maot nga kagahapon
Aron ako magpabilin nga magmalinawon