Sa dihang gitabunan sa kangitngit

Ang langob nga ganganga

Kay baklag na kuno ang iyang ginhawa

Pagkahuman sudli og mga mangtas

Nga mga halas nga nagtsinelas

Nga nikulit og nitiltil sa iyang

Hamis nga mga ngabil

Nga karon napuno sa samad

Nisalig man gud siya dayun

Sa mga pulong nga nagtawag

Niya’g rayna o di kaha diyosa

Og inosente siyang nagpadayun

Sa mga abusado ug tampalasan

Nga gihulma gikan sa istorya

Gitag-an na daan nga maoy

Magmando sa tanang butang

Pagkahuman nila ug lugit

Sa iyang mga hiyas

Pagkahuman nila og tun-lob

Diha sa iyang tim-os nga tubig

Wa lang gani kapananghid mugawas

Og gibilin ang makalilisang nga

Bantug ba gisi among sapot

Buslot among tsinelas ug

Bulingot pa ang among dagway

Sa lubot sa kalderong

Gigabaan kay dili

manghatag ug sud-an

Bantug ba wa mi ligo

Di sama sa inyo nga naa pay

Ulan sa tubo ug buwa

Sa sabong ambot makatang-tang

Ba kaha sa kabaga sa buling

Nga nibara sa inyong konsensya

Bantug ba nga ang among pani-udto

(Aw, pani-adlaw diay kun mukaon ra’g kas-a)

Kining bukog nga salin sa inyong iro

Gigrasaha’g nagpungasi nga mga laway

Sa mga dilang naningkamot

Pagkab-ot sa nahabiling langit

Bisa’g ing-ani among itsura

Wa mi nangayo’g bahin sa inyong gasa

Muluhod, mukamang, mutilap

Naunsa na ning akong mga tudlo

Kiatan kaayo mag-ambak-ambak

Sa mga letrang nagpauraray

Nagpaabot sa ligdong duot

Arun mga pangandoy makab-ot

Bisan maglisud ug porma

Sa pinulungang Bisaya

Nga dakung sagpa ngano

Mas suheto pa sa Iningles

Nga gisabak gikan sa pagka-ulipon

Kun ang mga katiguwangan

Pay pasulti-on, siguro

Nahuypan sa dili ingun nato

Sa taga-siyudad pa

Suyup pa more!

Bahala sila’g hubad kung na-unsa

Bahala pud kung usa, duha ra’y

Mubasa sa akong mga putot nga balak

Basta nag-agik-gik ko sa pag-agay-ay

Sa mga pinulongang Bisaya’ng dyutay