Tinahod kong Mr. Litogo ug Mr. Jose,
 
Maayong adlaw kaninyo mga higala!
 
Dako kong garbo nga nahimamat kamo bisan pinaagi lamang niining balayang Binisaya.com. Tinuod nga ubay-ubay na ang akong nakat-onan gikan sa inyong makinaadmanong pagbinayloay og mga kaalam ug panghunahuna mahitungod sa pinulongang Binisaya. Tungod niini, mas ilabihan akong nadasig ug naikag nga tun-an ug palamboon ang akong kaalam niining atong lumad nga pinulongan.
 
Dili nato ikalimod nga daghan sa atong mga kaigsoonang Bisaya ang walay igong katakos kun kahigayonan nga duawon kining atong balayan hilabi na sa mga lagyong dapit nga wala nauso ang gitawag ug internet. Sayod ko nga nagkahiusa kita sa pagtoo nga kining kaalam nga atong gisaw-an niining higayona angayan lamang nga atong ipaambit ngadto sa atong mga kaigsoonan bisan diin man niining kalibotana hilabi na sa mga kabatan-onan sa Kabisay-an ug sa Mindanao.
 
Isip usa ka ubos nga kawani niining usa ka inilang publishing house dinhi sa kaulohang Maynila, kinasingkasing ko kamong gidapit sa pag-uban kanako sa pagmugna og libro kansang tumong mao ang pagpalambo sa atong lumad nga pinulongan subay sa programang Mother Tongue sa Departamento sa Edukasyon. Tingali maingon nato nga usa kini ka ambisyusong lakang apan walay imposible kon kita magtambayayongay.
 
Agig pag-uyon niining pagdapit, mahimo kamong mopadala og personal nga mensahe pinaagi niining akong email address, brainchild012073@yahoo.com. Andam akong motubag sa inyong mga pangutana kutob sa akong mahimo.
 
Kon ugaling aduna kamoy personal nga kalambigitan sa Akademiyang Binisaya, ikalipay ko og dako kon aduna kamoy ikasugyot nga mga personalidad nga sakop sa maong hut-ong nga mahimong makaayuda kanato niining atong mga laraw. Pangandoy ko usab nga mahisakop sa maong katilingaban. 
 
Daghang salamat. Malipayong pasko ug mabulokong bag-ong tuig kaninyo.
 
Kaninyo matinahuron,
 
Sherwin M. Cesar 
 
PS: Wala akoy laing pamaagi sa pagpadangat niining pagdapit gawas sa pagsulat niini isip usa ka blog entry.