Home › Blogs › 's blog

PUJs BAYAD PISO, AYHA SULOD SENTRO

Thu, 09/22/2011 - 01:06 — Wail

 PUJs bayad piso, ayha sulod sentro

Sinulat ni Manuel M. Egay Jr.
 
BUTUAN City –  Balaod sa dakbayan sa Butuan alang sa PUJs :  'no piso, no entry' .
Giyam-iran kini sa ginsakpan sa transport sector sa dakbayan, kinsa miingon nga "gibug-atan kami kaayo sa piso-piso’ng toll fee' matag entra namo sa sentro sa dakbayan, ilabi na kay labihan kamahal ang presyo sa lana karong panahona."
Atol sa tigom kaniadtong usang adlaw uban kang Mayor Ferdinand Amante Jr., gipahungaw  sa operators ug drivers  ang ilahang mga sentimento batok sa toll fee nga nakasamot pagpaut-ot kanila.
Nasayran nga matag sulod sa PUJs nganhi sa dakbayan agi sa Ampayon ug  Libertad,  kobrahan ang matag unit  og piso’ng toll fee.
Isip reaksiyon, si Mayor Amante nangatarungan nga ang pagkolekta sa piso-piso’ng toll fee gipasubay sa ordinansa sa syudad ug “ang inyong gibayad, among gibalik kaninyo pinaagi sa mga proyektong kamo ra gihapon ang magpahimulos."
Hinoon, gibutyag ni Mayor Amante nga amendahon sa konseho ang ordinansa aron wad-on ang toll fee matag Sabado, Domingo ug Holiday.
Mireklamo usab ang transport sector batok sa illegal canvassers nga “maoy naghari karon sa kadalanan, ilabi na  atbang sa Philcom.”
Dihadiha, gimandaran ni Mayor Amante si Mr. Alfredo Radaza, hepe sa LTTMO, sa pagsita sa tanang illegal canvassers ug pagkontrola sa mga rota sa PUJs aron dili mosamot ang kaguliyang sa kadalanan sa dakbayan.
Ipadakop  usab ni Mayor Amante ang colorum PUJs nga naghitak karong dinhing dapita. 
Siya makigtagbo uban sa kapulisan, LTTMO ug LTO karong adlawa aron tuki-on  kini nga hisgotanan. (MMEJ/rsf)