TANDAG City – Gibatikos og maayo ni Surigao Sur Governor Johnny Pimentel ang New People’s Army (NPA) tungod sa walay pu-as nga panghasi sa iyahang lalawigan.

Gipasanginlan ni Gov. Pimentel ang NPA nga maoy misunog sa 13 ka dagkong makinaryas sa Bislig Ventures ug DOLE Philippines sa miaging semana.

Lakip sa gisunog ang lima ka dagkong dumptrucks, tulo ka Saddam hauler trucks, tulo ka backhoes, usa ka bulldozer ug usa ka boom truck.

Nahadlok si Gob. Pimentel nga tungod sa gihimo sa NPA, mosibog ang mga imbestor nga nagsugod na unta og pundar sa ilahang mga negosyo sa Surigao Sur.

Ang maong panghasi nahitabo sa DOLE compound sa Brgy Batunan lungsod sa  Tagbina ug sa Lingig, pulos sulod sa Distrito Dos. (uban sa report ni Mr. Greg Tataro Jr., Radyo ng Bayan)