Home › Blogs › 's blog

Korentisyan sa isda nakorentihan

Thu, 09/08/2011 - 18:54 — Wail

Korentisyan sa isda nakorentihan

Arjay S. Felicilda, Caraga Regional Bureau Chief
MINDANAO DAILY BALITA
 
        SAN FRANCISCO, Agusan del Sur – Usa ka labourer sa WAB Rice Mill nga nahimutang sa Barangay 4 ning lungsod sa San Francisco, nakorentihan samtang nangorente og isda.
Matud ni P/Supt. Martin Gamba, information officer sa Police Regional Office (PRO-13), kini nahitabo kaniadtong alas-9 sa buntag sa petsa-6 ning bulana.
         Ang biktima nga si Mr. Jessie Sandi ug pipila niya ka mga kauban sa trabaho, milusad sa sapa dool sa ilang trabahoan aron mangorente og isda.
        Siya mismo ang miboluntaryo pag-operate sa 11O volts nga linya sa koryente, isip ilahang himan sa pagpangdakop sa isda.
        Siya nagpalawom ug misinyas sa iyahang mga kauban sa pagplug-in sa linya ngadto sa tinubdan sa koryente. Dihadiha, siya mikirig ug milagpot padulong sa ilawom sa sapa.
        Gidali siya pagdala nganha sa D.O. Plaza Memorial Hospital aron patambalan, apan gi-pronounce nga patay pagdangat sa maong tambalanan,  nagkanayon si P/Supt Gamba.
        Nasayran nga sa Agusan del Sur, ilabi na daplin sa kasapaan ug sa Agusan River, naghitak ang mga korentisyan o mga mangingisda ginamit ang baterya sa sakyanan.
        Gikalibogan nganong linya sa koryente ang gigamit nila ni Mr. Sandi niadtong higayona. (uban sa report ni SPO1 Philip Amer Posas Mazo, Duty PNCO sa PRO-013 Information Office