By: Maanyag
Taipei City, Taiwan
 
Mitagak na ang mga laya nga dahon,
Uban sa mabugnawng panahon.
Kalangitan gihabulan sa baga nga panganod,
Unsay buot ipasabot, kinsa man ang nasayod?
 
Kusog nga mabugnawng hangin,
Ang mihalok sa kunot nga mga aping,
Mga mata nga hanap ang pananaw,
Didto sa Kahitas-an galantaw.
 
Kubalong mga tiil nga gasubay sa baybayon,
Mga balod miduol og mipahiyom.
Agi sa mga tunob nga milakra sa balas,
Gisunod sa mga umang, nagsilbing kompas.
 
Wala'y bisan kinsa man ang nagdahom,
Nga mga lakang niya maabtan sa kagabhion.
Ang buwan lamang nga misilib luyo sa mga panganod,
Ang nagsilbing saksi ning sugilanon.