Sa sulod sa mata'g dughan, may pagbati'ng naghigwaos
Ang uban tungod sa gugma, kadaghanan sa kayugot
Ngano ba'ng naingon niini ang nahitabô sa kalibutan
Nga unta atong nasayran ang kapungot wa'y kapuslanan

Kahibulongan nga gugma, dilî ba gidihog ka
Sa dugô nga balaan ni Jesus Anak sa Diyos
Unsa ba gayo'y hinungdan nga nagpalansang S'ya sa krus
Unsa ba'y Iyang nabatî nga walâ mabatî ko

Kahibulongan nga gugma, hain ang kainit mo
Unsa ba'y gikinahanglan aron ikaw maangkon ko
Kay buot nakong isinggit sa tibuok nga kalibutan
Nga ikaw ang tuboran sa tana'ng kalipay ko

Kahibulongan nga gugma, pun-a na ang dughan ko
Sa kusog ug kaisog sa gugma nga hingpit nga wa'y pagkapukan
Kay buot nakong maangkon, ang gugma'ng wa'y kamatayon
Kahibulongan nga gugma, suginli ako
Kahibulongan nga gugma, tugkaron ko ikaw.