Higanting bu-aya nalit-agan

Sinulat ni Arjay S. Felicilda, Caraga Regional Bureau Chief

BUNAWAN, Agusan Sur – Nalit-agan nila ni Mayor Edwin Elorde ang usa ka babayeng higanting bu-aya kaniadtong tungang gabii sa petsa-3 ning bulana diha sa barangay Nueve Era ning maong lungsod.

Ang maong bu-aya may gidak-on sa lawas nga 3.5 ka tiil ug 20 ka tiil ang gitas-on.

Kay nadakpan man pinaagi sa lit-ag, ang lawas sa bu-aya walay tatsa.

Namatikdan nila ni Mayor Elorde nga niadtong higayona didto usab sa palibot ang lalaking partner sa dinakpang babayeng bu-aya, apan naka-ikyas.

Matud niya, masdako ang lalaking bu-aya nga karon gipangita pa.

Sa pagkakaron, nangandam na sila si Mayor Elorde aron dalhon ang dinakpang bu-aya nganha sa Brgy. Masapia diin gitukod ang usa ka dakong tangkal sa mga bu-aya.

Ang lungsod sa Bunawan nahimutang sa lapad kaayong Agusan Marsh nga gipuy-an sa daghang bu-aya. (uban sa report sa PIA 13)