Sinulat ni Arjay S. Felicilda, Caraga Region

GIPALIG-ON  pa sa 4^th Infantry ‘Diamond’ Division, Philippine Army, AFP ang iyahang pwersa, ilabi na sa Agusan del Norte ug Misamis Oriental human sa sunodsunod nga panghitabo sa nahisgotang mga probinsiya.

Kini nga pahibalo gipalanog mismo ni Major General Victor A. Felix, hepe sa 4ID, dungan ang pagbahad nga lutuson sa iyahang ginsakpan ang nabiling mga ‘rebelde’ sulod sa ilahang hurisdiksiyon.

Gipahalipayan usab ni Gen. Felix ang ginsakpan sa 402nd Infantry Brigade "tungod sa ilang kahanas batok sa mga kaaway sa gobyerno." 

Ang pahalipay gipasikad ni Gen Felix sa maayong resulta sa engkwentro batok sa 15 ka NPAs kaniadtong usang hapon sa  Barangay Puting Bato, Cabadbaran City, Agusan Norte diin usa ka 'rebelde' ang napatay ug kapid-an ka mga armas, bala ug mga butang nasakmit sa kasundalohan.

            Lakip sa nasakmit ang tulo ka M16-Armalite rifles, usa ka M14 rifle,  usa ka AK-47 (Kalashnikov) rifle ug usa ka caliber 45 pistol.

Nasakmit usab atol sa engkwentro ang lainlaing mga bala, personal nga mga butang, subersibong dokumentos, landmines, mga tambal ug handheld radio set.

Ang namatay nga 'rebelde' wala pa na-ila hangtud sa pagkutlo ning maong kasayoran.

Gipasalig ni Gen Felix nga dili lung-an sa kasundalohan ang paggukod sa nahibiling mga kontra sa kagamhanan.

Sa iyahang bahin, ang tigpamaba sa 4ID nga si Major Eugenio Julio Osias IV nagkanayon nga ang maong kalampusan sa operasyon militar naangkon tungod sa tabang sa katawhan nga maoy mipahibalo sa mga orotidad mahitungod sa presensiya sa mga ‘rebelde’ sa ilahang dapit. (uban sa report ug hulagway sa 4ID)