Estranyo gi-45 ang ulo
Sinulat ni Manuel M. Egay Jr.
 
SAN FRANCISCO, Agusan del Sur – Gi-ulo pagpusil sa wala na-ilang tawo ang 23-anyos nga  estranyong lalaki kaniadtong usang buntag sa Bayugan 2, sakop ning maong lungsod.
Ang biktima nga si Mr. Michael Avilla Cabatlao, taga-Olaycon, Monkayo, Compostela Valley nga bag-ohay pa lamang nagpuyo sa Bayugan 2.
Sigon sa mga saksi nga samtang ang biktima dunay gipalit sa tindahan, alas-6:30 sa buntag, gitirohan sa wala na-ilang tawo ang iyahang ulo ginamit ang mubo nga matang sa armas, hinungdan sa hinanali niyang kamatayon.
Human sa hitabo, misibat ang kriminal ngadto sa wala natinong direksyon ug na-recover sa dapit sa krimin ang unom ka basiyong bala ug usa ka wala pa nakabutong bala sa  caliber 45 nga pistola.              
Matud ni Police S/Insp. Joel Binas, hepe sa San Francisco Police Station, wala pa nasayri ang motibo sa krimin, apan padayon kini nilang giimbestigar.
Buot usab susihon nila ni Police S/Insp. Binas kung “gun-for-hire” ang maong kaso, ilabi na kay ang kriminal walay kukahadlok nga mipuntirya sa ulo sa biktima.
Nasayran nga daghan na ang panghitabong naglambigit sa “gun-for-hire” dinhing dapita. Kasagaran sa mga kriminal nagsakay sa motorsiklo ug dali ra kaayong maka-ikyas human sa pagpamusil. (mmejr, uban sa report ni PO2 Darlin Cabalinan-Migullas, PRO-13 Info Office/asf)