Sa wala pa ka nitamak sa natad sa gugma-gugma
Nananghid ka daan sa imong mama og papa
Aron sila makapangandam og dagkong tuwalya
Nga mapahid sa luha sa imong mga mata
 
Ang gugma sama sa mga balod sa kadagatan
Pag-abot sa baybayon mahidugmo og mapukan
Nahisama sa kasing-kasing mong nasamdan
Tungod sa pasalig nga sa dila lang nagagikan
 
Dapat imong pagamatngonan og bantayan
Kini dunay batayan og usaka kamatuoran
Nga dili tanan nga mogilak bulawan
Dunay bildong buak nga mosamad sa imong balatian
 
Kung kasing-kasing na maoy masamad
Lisod gayud ang paghugas og paghunad
Mas maayo pa kung tuhod ang mapangos
Madala pag buhot sa kang lolang tinustos
 
Dili ni siya sama sa usa kalumba
Sama sa duwa sa imong pagkabata
Kinanghalan kinig higayon
Aron ang relasyon magmabulukon
 
Ayaw panundog sa uban nga mo-ingon
Aduna daw usaka panultihon
"Walay bata nga sa paglakaw nakat-on dayon"
Maong ang gugma tam-is pud tagamtamon
Kung dunay mga pagsuway nga latason
 
Ako,ikaw,siya,sa gugma duna pu'y kapakyasan
Apan dili na mao ang kinutuban sa tanan
Kay samtang nagpadayon pagtuyok ang kalibutan
Sa pagla-om,dili ikaw angay mawagtangan
 
Kung ikaw karon masulub-on og nag-antos
Tungod sa gugmang naangkon,dili tim-os
Ayaw basola imong kaugalingon og ang DIYOS
Hinumdomi may paglurang gayud ang unos
 
Siguro di pa karon ang imong takna og oras
Nga maangkon ang kalipay nga walay katumbas
Siguro imo pa karon ang tanang dimalas
Apan moabot ang panahon imo napud ang alas
 
Kung ikaw karon napuno sa mga pagtamay
Moabot ra ang panahon mahimo kang kalamay
Daghan unyang motila sa imong katam-is
Gikan sa imong ulo paingon sa batiis
 
Sa pagawas mo unya sa imong pinoy-anan
Ikaw kagubtan sa mga kalalakihan
Dili ka nila lutuson og paga-gukuron
Atngan ka lang sa unahan og gapuson sa mga bukton
 
Daghan na unya ang mangandoy sa imong gugma
Kay talagsaon ka dinhi ning kalibutana
Walay makatupong og makapareha
BABAYENG BOL-ANON;ikaw ra gayud ang nag-inusara.