By Maanyag of Taipei City, Taiwan
 
Dili gayud nato matupngan,
Ang kalipay sa usa ka inahan,
Sa dihang iyang masayran,
May gatubo sulod sa iyahang tiyan.
 
Ang kalipay walay susama,
Dili ikabaylo bisan pa og kuwarta,
Kay ang pagbaton og anak,
Pinakadakong regalong madawat,
 
Matag kisikisi sa gamayng anghel,
Mga sikad sa gagmay niyang mga tiil,
Mga kuhit sa pikdot niyang mga kamot,
Kalipay sa inahan ang iyang matag lihok.
 
Daw magtighagwa ang bata sa sulod,
Sa gasabak kaniya gustong magtigunot-unot,
Tumang kasadya og kahinam ang mabati,
Mga nasinati mapasigarbohong ipanabi.
 
Mga gagmayng sinina tanaw-tanawon,
Balik-balikon og pilo, simhot-simhoton,
Makapahimuot ang gagmayng mga butang,
Mapuno sa pahiyom ang inahang nangandam.
 
Matag labay sa mga adlaw nagkakulba,
Naghikabhikab sa adlawng gikatakda,
Adlawng paghimugso gipangandaman na,
Siyam ka bulang hinulat matapos ra.
 
Ang mga pag-antos og mga sakripisyo,
Sa usa ka inahan daghan gayud kaayo,
Apan ang gasa nga iyahang madawat,
Dili kabilhan, dili kabayran ang kantidad.