Niadto lang milabayng bulan. Nahasuroy ko's suba nga mao'y akong gidak-an. Kinse na ka tuig sukad kong nakataak sa maong dapit. Sa samang higayon, awaaw ug mga kasikas lang sa langgam ug ubang ihalas nga mananap ang madungog.
 
Giuban nako akong pag-umangkon, nanguha kog Gurame. Kining gurame, matang kini sa isda sa tab-ang nga gagmitoy kaayo. Ako man gung gisulayan ang tabay-tabay tapad sa akong gipahimong groto kung mabuhi ba. 
 
Tood man, duna gyud mi nakuha sulod sa di mominos traynta ka minutos. Gahangak man sad ko, wa na maanad kining lawas, ilabi na kay magsuong-soong man sad sa dagkong sagbot ug may kagingking pa sa kawayan.
 
Mga baynte minutos sad ang paglakaw gikan sa gamayng suba. Nangatol akong batiis sa dapaw nga mingsaghid niini. Niagi man sad gud mig kalibunan. Maayo pa unta kaayong ipangoot ug piyo, (Ang Piyo), mao ra nig Kasag, pero sa tab-ang ni mamuyo. Lami ning lubihan, labi  nag Manulo sa gabii. 
 
Pila sad ka gutlo kong naghinuktok. Dugaya na's panahon nga wa na ko nakabalik sa maong lugar. Di raman sad noon klaro ang kausaban. Tiaw mo nang Kinse ka tuig.