Usa ka tuig kapin natong panag-uban

 sadya ug masulob-on nga kahigayonan

 adunay mga panahon kita mag-away

 apan 'duna 'sab kadtong kita nagmalipay

 Sa tanan kong mga salaod pasayloa ako

 kadtong mga kalapasan gimahayan ko 

 ug ang mga kasakit kong nabuhat nimo

 hikalimti ug papasa na sa dughan mo

 Daghang salamat sa imong mga kahago

 mga panahon mong gihatag kanako

 dili mahimong ikabaylo og salapi

 mga handomanan mong gibilin linahi

 Kay gikan kanimo daghan kog nakat-onan

 ikaw taw nga mahigugmaon ug buotan

 labaw sa tanan imo akong gipakita

 kon unsa nga matang ikaw magpangga

 Busa karon ayaw naintawn kaguol

 kay ania ra man gihapon 'ko sa duol

 apan kon bisan mapakyas kining saara

 timan-i ang kahitas-an maoy sangpita

 Ug pangayo og malampusong kinabuhi

 nga makaplagan ang matuod nga kalipay

 aron walay pagkulang na kitang mabati,

 Nanghinaot ako walay limtanay.