3 anyos bata gi-hostage

Arjay S. Felicilda, Caraga Regional Bureau Chief
 
SURIGAO City – Nakaagbat og dakong hagit sa ilahang kahanas ang kapulisan ning dakbayan sa dihang gi-hostage sa tawong jobless ang usa ka tres anyos nga babaye kaniadtong usang adlaw.
Ang biktima nga si Ashley Barrozo Cabalan, taga-Purok 5, San Juan ning dakbayan,  gilabnot , gitutokan sa suspect og kutsilyo sa li-og ug gipugngan sulod sa igong gidugayon sa panahon itaas sa Betty Bakery sa maong dapit.
Ang suspect nga si Mr. Leomil Maramba Ybañez, 25 anyos nga taga-Brgy. San Juan, gi-negotiate dayon nila ni P/Supt. Alfonso Pagkaliwagan Jr., hepe sa kapulisan ning dakbayan,  ug ni P/Sr. Insp. Ruben Daraman.
Samtang nagpadayon ang negosasyon, mipahigayon og lina-in nga operasyon ang intelligence officer nga si P/Insp. Joel Cabanes hangtud nga naluwas ang biktima ug nasignit ang suspect.
Wala ikaasoy sa report ang hinungdan sa pagpang-hostate, apan giandam na karon ang kaso batok sa kang Mr. Ybañez.
Walay tatsa ang bata, sumala sa gimatuod sa mga doctor nga mihuling kaniya human siya na-rescue sa kapulisan. (uban sa report ni SPO1 Arturo S Campania, PRP-13 Info Office)