“2015 New Years Resolution”

By: Elmer Remecial

Sa tanan nga katuigan

Aduna kitay kabag-uhan

Sa atong mga kinabuhi

Nga gituohan tang hiwi

Bag-ong tuig bag-ong paghandom

Sa ngil-ad nga kaagi kita gigahom

Mao nga sa ato karon nga panahon

Namuga ang New Years Resolution

Kausaban sa bati nga batasan

Pagtul-id sa liko nga dalan

Pagbag-o sa atong pamayhon

Subay sa pagligid sa panahon

Mga milabayng katuigan

Ang nahimong sumbanan

Tanan atong gihanduraw

Aron pagbag-o sa panglantaw

Sa kinabuhing hiwi

Kitang tanan mudumili

Batasang maaghop

Kinahanglang ihangop

Sa tibuok tuig kita mangandam

Aron sa katalagman kita dili matagam

Sa Labawng Makagagahom kita musalig

Kay ang Iyang grasya kanato mobulig

Dos Mel Katorse milabay na

Dos Mel Kinse miabot na

Ang mga nangagi atong ilubong

Aron kabag-uhan musolbong

Susama sa uban nga katawhan

Naghandum usab ako ug kausaban

Ang ngil-ad nga handurawan

Kinahangla nga akong ilisan

Sa alak dli na muinom

Kay aron kwarta matigom

Ang naandan nga sud-an

Sa ginamos paga-ilisan

Imbis ang buhok sa gel pagahion

Snow bear nalang ang gamiton

Ang humay nga kanunayng kan-on

Ilisan nalang ug mga lagutmon

Ang taya sa lotto dublihon

Basin pa man ug swertihon

Dugangan ang pangita

Aron ang grasya mubaha

Bahala na’g tawgon ug kuripot

Basta sa kalisod kita makaipsot

Dili na kita kinahanglan manglibre

Ang pagkatihik maoy atong ipasulabi

Bulsang busloton

Kinahanglang tahion

Panudlanan ablihan

Kay sa grasya tugpahan

Kining tanan ihangad sa kahitas-an

Kay sa kadagaya kita panalanginan

Sa Ginoo kita mag-ambahan

Aron sa grasya kita bubuan