BUDHI   (October 24, 2012)

tanlag mo

walay kukaikog

mitugot

dagiton

sa hinoyohoy

ang kinuptanan ta

lampos man

nahipalaom mo

kasayang

pakyas man lang

unsaon pa

may lain kang hari

budhi ba

diay ang sukli

pag-unong

usik lang

kagahapon na

ang karon

ug kanhiayng ugma

November 24, 2012

mga batang hubô

nanagduragandagan

didto adtong posong

màoy kukaligòan

Modangat pa unta'ng kalinaw
Ug mag-abag kong sugdan ni;
Modangat na unta'ng kalinaw
Kanang kalinaw nga di mini.

Di ba amahan ta ang Ginoo?
Nan tanan ta managsuon;
Mari ka akong igsuon,
Alimon ta'ng mga kasilo.

Sugdan ko na unta'ng kalinaw
Di kay ugma, karon na karon!
Sa nabilin kong mga adlaw,
K'ing gipanumpa ko tumanon:

Nga magpuyong mahigugmaon,
Di na bungol sa nanagtuaw;
Modangat na unta'ng kalinaw
Ug sugdan ko na ni dayon ron.